وجهة نظر

لو هيبقى لك خليل
صاحب الشهم الأصيل
عنّك الأحمال يشيل
وتلاقيه فى الشدة جار
ــــــــــــــــــــــــــ
مش كلام من غير معانى
وللا أفلام أو أغانى
أونوايا أو أمانى
أو مجازفة أو قمار
ــــــــــــــــــــــــــ
الصداقة طرح طاب
خالى من بذر العتاب
للهنا والفرح باب
نسمة باردة ف جو نار
ــــــــــــــــــــــــــ
تلقى صورتك فيه مراية
يبقى حرصه عليك هواية
يوم ما هتمسّك غواية
هتلاقيه زى الفنار
ــــــــــــــــــــــــــ
متعته يشوفك سليم
وتلاقيه صافى وحليم
وإن ملك تلقاه كريم
يعفى من غير إعتذار
ــــــــــــــــــــــــــ
الصديق زى السفير
صحبته تخليك أمير
أو حثالة أو حقير
لو أسأت الإختيار
ــــــــــــــــــــــــــ
هتلاقيك دقت العذاب
والنهار والليل عتاب
يهرى لحمك فى الغياب
وتلاقيه هدم ودمار
ــــــــــــــــــــــــــ
تلقى سرك مش فى بير
هو دة الأمر الخطير
حكمة من فم الخبير
يخرب القط الكرار
ــــــــــــــــــــــــــ
الكلام دغرى وصريح
مش مجامل أومريح
بس ع الخط الصحيح
كله جد ومش هزار
ــــــــــــــــــــــــــ
طلعت الحداد