صوت الضمير

صوت الضمير

يا ضمير وساكن فى التابوت

إصحا وفوق إياك تموت

لو مت هتموت قلوب

والشمس تطلع فى الغروب

والخطوة تبعد فى الدروب

يا بلدى محتاجه لضمير

يصرخ ويهمس فى الودان

يكتب شعاره ع الحطان

يبدر بزوره فى الغيطان

اصرخ واصرخ يا ضمير

علشان قلوب متغلفة

مموتاك وملفلفاك ومستفاك على رف فى الزمن البعيد

مش محتاجين إنك تقول إن قلوبهم إنملت تجاعيد

مش محتاجين إنك على جرحهم تحط الأيد

باعوك بدون تهديد

وقلوب عرايا مكفكفة

كفكفها برد الظلم أو حق كان مهضوم

كفكفها صوت الحق لما كان مكتوم

كفكفها دمعة ضعيف أو دعوة من مظلوم

يا حزن فى قلوبنا أسير

انفخ وطلع فى الزفير

واصرخ ونادى ع الضمير

قولوا تعالى جنبنا خليك فى كل مكان

حارب معانا الظلم واقضى ع الطغيان

فى المصنع وفى المدرسة فى عيادة الدكتور

فى غيط بيطرح سنابل فى أرض لسه بور

فى قلب طفل بيتولد لسه ما شافش النور

فى بسمة فى دمعة فى همسة فى لمسة فى البيوت والدور

فكرنا لما نيجى على بعضنا ونجور

خليك لنا الأب الكبير

غطى الخشونة بالحرير

وقول أنا صوت الضمير