** الـمـتـســول و الـمـتـعــــــة... أرجو المتابعة**

بسم الله الرحمن الرحيم

ها أنا وأنتم من جديد

مع رواية جديدة

ياترى تكون خيال ولاّ حقيقة

طبعا كلنا عارفين المتسول ..

فهو الذي يسلب منا العطف .. وترق لها قلوبنا .. ونعطيه مما أعطانا الله

ولكــــــــن..

ماذا عن المتسول الذي معي

سأفتح لكم نافذة صغيرة على العالم ..ونرى معاً متسول من نوع جديد ومن نوع فريد
وهو

متسول 2009 ..

هاتقولوا ليه مش 2010

هاقولكم لأن روايتي دي إصدار 2009

وهى تباع بالأسواق منذ ابريل 2009

معانا هنا كل شيء حديث

بلوتوث

مالتي ميديا..

انترنت

روايتي باسلوب عامي بسيط وبلغة شباب اليوم

ياترى أنا فيها بناقش مشكلة المتسول ولاّ
إيه
؟
؟

ودلوقتي

بأه نبتدي الحكاية

روايــــة المـــتـــســــــــــول و الــمـتـــعــــــــة
؟
؟

وتبتدى حكاية متسولنا العصري في قرية ريفية .. بيت كبير دورين
وواسع جدا يجمع عائلة المرزوقي.............. وهي عائلة مترابطة جدا وكلمتهم في البلد مسموعة , الأب متوفى, والأم الحاجة جميله عايشه معاهم في البيت.!

وابنها الكبير عبدالله المرزوقي أرمل غير متعلم.. و هو اللي مُتحمل شؤون البيت كله والأرض الزراعية ومعاه فتحي ابنه أما مصطفى بيعالج المواشي

والتاني عدنان (البطل) متعلم خريج آداب,واد حليوة شايف نفسه والمتعلم فيهم ودا بطل القصة إجوز وهو في أولى كليه من بنت عمه رباب دبلوم تجاره عنده أولاد احمد وأمل ومراتة ست طيبة على نياتها و شايلة البيت كله
وأخت عدنان الصغيرة نفيسة طالعه من تالتة
اعدادى متجوزة حمودة مدرس الألعاب بمدرسه البنات الإعدادية,ومعندهمش أولاد!

وتبتدى الأحداث بآدان الفجر في القرية ,و إ بتدت الناس تصحى وتدب الحركة في الشوارع! وبعضهم يروح يصلي الفجر في جامع الرحمن اللي جنب بيت المرزوقي ! وبعضهم واخد المواشي ورايح الغيط!

بتصحى الحاجة الكبيرة جميله:أصبحنا وأصبح الملك لله تروح الحمام تتوضى ماشيه بالعافية لأنها ست عجوزه وتدخل وتقفل الباب وراها.

بتفتح رباب باب اوضتها وتشمر كمام جليبتها , تعدى على أوضة أحمد ابنها تصحيه تخبط وتنادي........................

رباب :واد ياحمد إصحى ياولا عشان تصلي الفجر, وتروح على الحمام وهيه بتتاوب وتفتح الباب .. تلاقى اللي بتصرخ في وشها تتفزع!

الحاجة جميله: جرا إيه انتى داخله زريبة ؟ مش تخبطي الأول قبل ماتخشى!!
رباب باستغراب: هو في حد بيخبط على باب الزريبة قبل مايخش ؟إيه يستأذن البهايم مثلاً !

الحاجة جميلة: بهايم يا عديمة الرباية وفتحت الباب وهية بترفع البنطلون ,انتى داخله بيت الراحة ولا زريبة يا للي مش بتفهمي ؟

رباب :إنتي قولتي زريبة قولت فبالى يمكن غيروا اسمه وبقى زريبة , ماهو من زريبة لحمام يا قلبي لا تحزن

الحاجة جميله :تصدقي بالله ابني إلو حق يطفش منك ويدنو في مصر امشي من قدامى روحي ياشيخه

احمد : صباح الخير يا ستي مالك بس على الصبح ؟؟؟ زعلانه ليه؟

الحاجه جميله: أمك دخلت عليا وأنا في بيت الراحة ......لما قلت راحتي البعيدة!

احمد: معلش ياستي وبعدين اسمه حمام

(رباب طلعت من الحمام وتنزل كمام الجلبيه وتنشف وشها بصت للأحمد وقالت) :إنت صحيت ياضنايا يلا بسرعة عشان تلحق الصلاة

احمد : صباح الفل يا ست الكل

الحاجه جميله : شوف الواد بيدلع أمه و سايبني ازاى؟

احمد:انا اقدر يا ستي دانتي الخير والبركة,( وكمل في سره ادخل الحمام أحسن ودخل وقفل الباب)

أمل: صباح الخير ياستي صباح الخير يامه , إيه مش بتردو ليه وبصت لهم وقالت: آه بتصلو طيب وراحت على الحمام تزق الباب

احمد: انا جوه يا زفته

أمل: اخلص اطلع هاعمل على نفسي

احمد: مش طالع انا لسه داخل وهاتوضى

أمل :اطلع إتوضى على الحوض اللي بره والنبي

احمد:مش طالع بالعند فيكي.. وهاتستني اما اتوضى

أمل تخبط على الباب : اطلع بقى يامه يامه طلعي ابنك

رباب إسطبحوا عالصبح..... ولآد عمكم نايمين مش عايزة دوشة

احمد طلع وخبط أمل على راسها وجرى على جوه وكان احمد في تالته ثانوي , اما أمل في أولى ثانوي!

الحاجه جميله: يا رباب صحي أولاد عبدالله عشان يصلوا ويروحوا أشغالهم

رباب: طيب طيب يا خالتي ها صحيهم, وراحت صحتهم وجه فتحي يصبح على جدته وقبل مايتكلم

الحاجه جميله :تخبط كف على كف وبصت لفتحي قالتله إنتا مين يابنى؟ وكملت فسرها الواحد اليومين دول عاد بيشوف أشكال غريبة في البيت دا!!

فتحي :أنا فتحي ياستي ابن عبدالله !

الحاجة جميله :يوه عبدالله مين ياولا؟

فتحي: عبدالله ابنك ياستي ,ييييه دى هاتشتغلنا على الصبح .. وسابها وراح يتوضى عشان يصلى,( وبردو الحمام .. شكله يوم الحمام العالمي)

الحاجة جميله :آه والنبي عبدالله ابني حبيبي ربنا يرجعك يابنى من غربتك بالسلامة.
رباب تتعجب: غربة إيه ياخالتي!! عدنان إللي فمصر وبعدين هيه مصر غربه وتتصعب اوى على حماتها!

الحاجة جميله:شوف البت بتناكفنى ازاى.. دى هبله مش عارفا إن عدنان نايم جوه ونادت: ياعدنان إصحى يابنى

طلع عبدالله من غرفته يتاوب : صباح الخير يامه عامله إيه وإيه الدوشه دى على الصبح

الحاجة جميله: مراتك بتشككنى في روحي .. أقولها عبدالله اللي بيشتغل فمصر تقولي عدنان وتتصعب اوى ,بكره مراتك تنسى هيه متجوز ا مين!

عبدالله : يامه أنا عبدالله ورباب مرات عدنان سلامتك يامه في إيه؟ هيه التوهه رجعتلك تاني ولاّ إيه؟
الحاجه جميله : يوه !! أه والنبي صحيح مش تآخذني يابنى!! روح صلى وافطر معاهم وطبطبت عليه وكملت روح ياضنايا

أما نفيسة تفضل نايمه وجوزها يصحى على آخر لحظه ويتأخر على مدرسته
والحاجه جميله قاعده في مكانها المفضل على كرسيها المميز في نص الصالة وبعد مالبيت فضي وكل واحد مشي بطريقة

طالعه نفيسة تتاوب ولابسه جلبيه صفرا وتتمطع اوى والحاجه جميله قاعدة تبص على نفيسة وتقول فسرها إيه دي؟ وتحقق النظر أوي وتقول يوه مين دي؟ شكلها غريب ,ومالها محصبة كدا ليه! ونادتها إنتي يابت...............

نفيسة :ايوه يامه
الحاجه جميله: امك ؟امك منين يابت انتى اتهبلتي, هاتجبيلى بلوه على الصبح داني لسه مخشتش دُنيه ولا إتجوزت ولا خلفت!!

نفيسة تخبط على صدرها: يالهوى مالك ياوليه إنتي شيفالك شوفه ولا إيه؟ دانتي خلاص طالعه منها ,أنا نفيسة يامه باين عليكى مخك توه تاني!!!

الحاجه جميله بغضب : طالعه اما تاخد أجلك و توهه إما تاخدك يا بعيده! وتهز دماغها وتكمل وأنا لو خلفت هاخلف حاصبه زيك!! انتى يابت إيه اللي لابساه على الصبح دا!! حد يلبس احمر بردوه ؟

نفيسة :دا اصفر يامه سلامة الشوف

الحاجه جميله :يعنى عندك الصفرا ,(وفجاه لقيت حمودة طالع بيطمطع من الاوضه) قالت: يالهوى هو أنا قاعده في محطة مصر ولاّ إيه ؟أما أقوم على اوضتى بلا خايله فاضيه ودخلت اوضتها

نفيسة بدلع : صباح الخير يا حمودة وحشتني ياراجل

حمودة باستغراب: في إيه يا نفيسة مانا نايم جارك طول الليل
نفيسة :أديك قولت نايم !! يعنى لا بتصد ولا بترد بلا خيبه!! إتلحلح ياراجل دا السرير هاينطق من الحلاوة اللي عليه !

حمودة: قصدك هايهج من ريحة الجاز اللي مغرقه روحك بيها!! والنبي خفي شوية
نفيسة : جاز ! الجاز دا عند امك مديحه بياعة الفجل
حمودة: إحفظي لسانك يا نفيسة مالك ومال أمي على الصبح

نفيسة بدلع تغنيله وماسكه ضفيرتها تلعب فيها وتخبط فيه: بمبي بمبي تعالى جنبي بمبي بمبييـــــــــــــه!!!

حمودة يبعد عنها: لا صفرا ورخمه قوى كمان!!

نفيسة بعصبية :إيه ؟؟ مره اغنيلك ومره احايلك, وفرشتلك وهندمتلك وانتا مايل وإيه يعدلك!!

حمودة بزعل:كدا يا نفيسة بتزلينى كمنى قاعد في بيت ابوكي ماشى! وأديني هامشي من غير فطور ولا حتى داخل الدابيلو سين هاروح المدرسة بس يارب ألاقيهم فتحو الفسين عشان اخدلي غُطسين على الماشي ولا الحوجه لحمامكم يا نفيسة يل أنا ماشى ومن غير سلام
وراح لبس هدومه يبصلها بقرف وقافل مناخيره وعدى بسرعة وقفل الباب

نفيسة تكلم فنفسها : جاز!!( وتشم هدومها وشعرها وتقول : ماهو حلو اهوه إلا إيه الفسين ده حاجه بتتاكل ولا بتتشرب ؟! (وتتصعب ) :هه حمودة بقى يعرف الفسين الله يرحم أمه مديحه الهبلة

تيجى رباب تتسحب ونفيسة مدياها ضهرها وبتكلم نفسها تيجى جنب ودنها وتقول مره واحده :انتى اتهبلتي يا نفيسة بتكلمي روحك؟

نفيسة اتفزعت :الله يخربيتك قطعي الخلف من عندي!! ياشيخه تنحنحي اعملي حاجه ناديني مش تخضينى كدا!!

رباب :هو انتى مستنيه حد يقطعلك الخلف ماهو مقطوع خلقه,قاعده بتكلمي روحك تقولي إيه؟
نفيسة هو إيه الفسين دا يامرات أخويا؟

؟
؟
؟

تابعوني