من خيوط الشمس

( من خيوط الشمس )
من خيوط الشمس بَغزِلِك
ياحبيبتى وردة
وكام فُستان وكام طَرحَة
من النهاردة
وكام عقُد لولى ودَهَبى
ونجومى شاهدة
لكِن إنتى ياحبيبتى
لِسَة زَى مانتى
غَزالة شاردة
********
أنا اللى بإيدى هَلَبِسِك
فُستان فُستان هَتغَيَرى
وعقُد ورا عقُد هَتبَدِلى
قُدام المرايا تتصَوَرى
لما تشوفى فيا نَفسِك
بَكَمِلِك أبقى نًصِك
هَتنبِهرى وتقَرَبى
وتُحضُنينى وتِستَغرَبى
على هَمسى ويا هَمسِك
من غير مِناهدة
*********
راح تكونى طوعى
وتَحت نَظَرى
لما ألاقى عُمرِك
بيضُم عُمرى
راح تكونى مَلِكَة
على عَرش قَصرى
وأنا ليكى حاكِم
بَحكُم بِأمرى
ويتمَد وصالِك
ومعاة دلالِك
بِأشواق مُساعدة
**********
أنا فارِد جِناحى بِخَيالى
بَطير عَليكى
غَزَلتِلِك من الحُب ياحياتى
بُرقُع لِعِنيكى
مش عايز حَد يشوفِك فى حَياتى
يِتهَنَى بيكى
غير أنا وعيونى
وهَمسى وجنونى
إنتى مش أى واحدة
************
صَدَقينى أنا بَحِبِك وبَعشَقِك
وإخلاصى نادر
إفتَحى ليا قَلبِك هَتلاقى
إحساسى مِسافر
لو هَوصِف حُبى هَوصِفُة
إزاى مش قادر
أنا حُبى ليكى مايتوصِفش
فوق أى وصِف مايتقالش
يتحَس بَس باللمس
والتوها ويا الهَمس
بِآهات مش باردة
**********
كلمات : يوسف أبو زينة
23 / 9 / 2011 م