من مواويل الزهيرى

من البشر ألوان جوه العيون مرسوم

على كل شكل يبان فى الطعم زى الدوم

زعلان ومتحير مش راضى بالمقسوم

باكى على حاله

ما اعرفش أيه ماله

فى الهم ترحاله

عايش فى أحزانه مش راضى منها يقوم

الشاعرة الرائعة والأخت الكبرى وداد الهوارى :

سعيد بهذا التوضيح وديوان بحر الخوف لم يصل إلىّ وأنتظره فى أقرب فرصة وعدم وضع نموذج

للموال فمساهتمى الأولى تعد نموذج من وجهة نظرى وموضوع المساجلة محدد حسب اختيار

أخى الشاعر الكبير عادل سند فى الجلسة التى تمت بعد ندوة الاتحاد

وما ورد من معلومات قيمة عن طريقكم فى شرح كتابة الموال شىء رائع ولكن الممارسة للكتاب

الشباب أفضل ليعتاد بنفسه ويكتشف القاعدة التى سيسير عليها

واختلاف الرأى لا يفسد (للود ) قضية

فى انتظار مساهماتك يا أختى وداد

أخوكى جابر

الأستاذة الشاعرة بسمة الورد :

من قبل كنت أنا والزملاء قد قمنا بعمل مساجلات فى فن الواو وربحنا مجموعة كبيرة من الشباب

اللذين تميزوا فى هذا الفن

والأن أحاول فى هذه المساجلة الحصول على متميزين من الشباب فى فن كتابة الموال

أتمنى التواصل بمساهمات منكم

خالص تحياتى

الزهيرى

برطع فى وسط البشر كلّه هايكتم هس

أرفس هايجروا قوام ولا يبقى غيرك بس

هايفضى ليك الميدان ولا يبقى فيه ولا حس

وإن حد جه أرفسه

وبالحداوى إهرسه

واقطع لسانه .. اخرسه

وإن جم بذوق يهمسوا نفض لقولة إس

حمار لكنه ذكى وحروفه مدروسة

ماجاش فى يوم يشتكى من نعجة وجاموسة

مكار وناصح قوى تقولشى إيه سوسه

لو تشتمه ينتشى

ولاعمره كان يختشى

أبو بردعة مشمشى

قالوا له ليه ترتشى قال بعشق الكوسة

الزهيرى

قالوا له أيش حمرك واللون ماهوش أحمر

ولا عشان منظرك خلى العيون تسهر

مترد لو بنهيق خف الدلال يا اسمر

قام رد وبعنجهة

أنا يا ناس منجهة

عم الحمير كلها

لو حد شاف سحنتى لازم أكيد يسكر

الورد ع الخدين قالوا الحمار عابوا

ف الغيرة م الحلوين الغل فيه دابوا

أزاى نكون بساتين تعبوا فى قول خابوا

فضحكنا ف الموضوع

على همهم منئوع

والفرح فيه بيجوع

ولا نيه جات صافيه ولا عمرهم تابوا

اإهداء منى إلى الشاعرة الرائعة ماما وفاء أمين

لحلم لينا حق وأستكتروه الناس

فاكرينا ندخل شق وبنحنى فيه الراس

ثورنا فى قوله لأ ليه تأذوا ف الإحساس

جانى الوفا بالورد

وأخوات تصون العهد

واقفين فى ساعة الجد

ساندين خطاويه واقفين تقول حراس

الراوى لف وقال فى حكاية سمعنا

غنى وقال موال جه مس أو جاعنا

قولناله قولك عال قسم ومتعنا

غنى على ربابك

يا حافظ اصحابك

خبطت على بابك

رد وقال لى سلام ولا عمره يوم باعنا

إهداء منى إلى الأب الفاضل والشاعر المبدع الكبير بابا عادل سند

فاكر زمان إنسان القلب فيه صافى

وحديثه كان وناس والحرف ليه شافى

ولا عمره أذى إحساس طبطب على اكتافى

قالى أنا سندك

واللى يعاديك يهلك

ف الننى بين أهلك

مين راح عليك يقدر يا ابو قلب متعافى

إهداء إلى مبدع فن الواو والموال معاً أخى الفاضل جابر الزهيرى

بصلة محب خاروف ليهالماعون جابوا

فيها اللى غمسوا خوف والشعر فيه شابوا

وفيها اللى غمسوا حب ولا عمرهم عابوا

قالوا نجابر زاد

ف العزوة والزواد

جاركم شموع تنقاد

يااللى معاكوا الفرح خلى الهموم غابوا

العقل فيه قوة والقلب صاينها

ونفوسنا من جوه الورد زاينها

يرقونا ميت رقوه إحنا اللى حارسنها

م الخاين الغدار

وف قلبه قايد نار

أخدين بأيدنا التار

ولا عمره راح يقدر يهدم فى أركانها

لما الحمار أفترى وحس أنه كبير

نهق بصوت عالى وقال فيه سر خطير

وكل مين يعرفه لازم يصيبه الخير

لحمى دا لحم غزال

وبيصنع الأبطال

سمعه الجميع فى الحال

سابوا الطيور والسمك وأكلوا لحم حمير

الزهيرى

عشان حمار قلهم ع السر ما سكتشى

وجزارين وقتها عليه ما صبرتشى

قالوا تعالوا نشوف وندوق ما نخسرشى

عشان غشيم دبحوه

بوفتيك كمان عملوه

ع الفحم جم وشاووه

وقالوا أحلى كباب أهبر متسألشى

الزهيرى

حلوة العركة الناعمة دي..
طالعة منها ريحة برفان بس يارب ماتطول ولا تتعدي حدود اللوم والعتاب .
كلكم فوق مستوي ال.......
تحياتي.