جايلى عريس

وقف فى آخر الشارع
وقام ناده بعلو الصوت:
يابت انتى....
وقفت مكانى وادوّرت بصيتله
فقام ضاحك
وقالى خلاص ياقمرايه
حسبتك بالغلط أختى
وآه يا صحابى على بختى
بدأ يتمشى ورا مِنّى بدون ولا صوت
وكنت خلاص ساعتها هموت
مانيش خايفه ولا حاجه
لكن موقف لأول مره يحصلّى
وصلت البيت بدون ولا كلمه ولا همسه
لا أزعجنى ولا ضايقنى ولا اقدر اسمّى دى معاكسه
دخلت بسرعه أتوضى وأشكر ربى وأصلّى
دا شئ والله ياجماعه لأول مره يحصلّى
وما انكرشى..
أنا فكرت فيه ساعة ما رحت أنام
ورغم انه لقاء صامت مفيهش كلام
لكن يمكن شغلنى معاه عشان قلبى مادقش الا لحظتها
ومرّ اليوم وراه كام يوم وايه يا أميره أخرتها؟
خلاص البال صبح مشغول
دا مش معقول
وليه احساسه جوايا بنظرة وضحكة يوصلّى
ولما اتعب من التفكير أقوم اتوضى وأصلى
بسلّم م الصلاه وقايمه لقيت أمى
ورا الشباك تبص ومره تتدارى
ولمحتنى متابعاها فقومت بسرعه اتدارى
لقيتها ورايا ضحكتلى وقالتلى بصوت هامس
عريس جايلك مؤدب شكله ولا شاغب فى مره ياحلوه ولا عاكس
تعالى معايا م الشباك هوريكى
راجل موزون يارب يابنتى يرضيكى
وقومت بسرعه ورا منها على الشباك
لقيت الحلو قاعد يقرا فاتحة هناك
وقف قلبى من الفرحه وكنت هموت
وزغرد كل شئ فيا بدون ولا صوت
حبيب الروح طلع هو ودخل م الباب
وكنت ياناس حسبت خلاص مليش أحباب
صداع قلقى وأحزانى وكل الخوف صبح ممنوع
خلاص أفراحى بقى ليها وجود عندى وصوت مسموع