عارف / كان نفسى أوى

( 1 )



فى أخر السهرة



هتمد إيدك جوه جيوبك



وتحاسب



عارف



كان نفسى أوى



بدل الفكة تطلع صاحب



وتقوله وحشنى



*************************



( 2 )



الدبلة الملفوفة على صباعك



من سن العشرين



ضاقت



عارف



كان نفسى أوى



ترميها ف ضهرك



من بعد ما غابت



*************************



( 3 )



إمبارح



الساعة 3 الفجر



سألتنى : انا لسه ف قلبك ؟



ماعرفتش أجاوب



عارف



كان نفسى أوى



أخدها فى حضنى



وأضحك



وقبل ما انام أتاوب





*************************



( 4 )



قابلت القس ( ديمترى )



من كام يوم



سلمت عليه من غير نفس



سابنى وعدى الشارع



عارف



كان نفسى أوى



أحضن كف إيديا بــ كف إيديه



ونعدى الشارع



*************************



( 5 )



زمان



كنت بخبى سيجارتى عن عينه



فــ يفضحنى الدخان



يجز على سنانه ويقولى



صحتك بالدنيا يا غبى



عارف



كان نفسى أوى



يفضل جنبى



وافضل غبى

أستاذ أيمن
الله ينور عليك
وعلى الأحساس الرائع اللي كتبته
في الدفقه الرائعه
سعدت أن أكون أول من يمر على هذا العمل
أخوك الصغير
جمال الدليل

..........................................

الاستاذ الشاعر

ايمن عثمان

كلمات ممتلئة بالاحساس المرهف

ومقاطع مكثفة المضمون والمعنى

تقبل تحياتى . وأهلاّ وسهلاّ بك ..