سكران حب ..القصيدة الفائزة لشهر فبراير 2010

ألف ألف مبروك أيها المبدع المتميز أحمد موسى بصراحة العمل أكثر من رائع وكثيرا ما كنت أسرح بخيالى مع جمالة وفقك الله دائما وجعلك تبدع أكثر فى سماء الشعر

ايه الجمال ده يا استاذ احمد بجد رائع وكلام جميل جدا جدا
احسنت والف الف مبروووووووووووووك Mad

الحقيقة انا مش لاقى كلام اقوله ليك بس هقولك تسلم ايدك فعلا على الكلام الجميل ده

أحمد موسى كتب:: بحبك ياللي من حسنك تغير الحور
و بكتب شعر لعيونك بخيط من نور

وبكتب بالدهب وصفك
وكل الشعر مش واصفك
لكن يا حبيبتى بحلفلك
لهجعل كل أشعاري
تخلّي السحر من شعري
يكون مبهور

عيونك لؤلؤه شايله
معاني السحر ف النني
عيونك جنه والجنه
نسيمها بمسك متحنّي
وشَعرك نيل بدون ضفّه
جبينك طفل ف اللفه
قصاده الشمس تتخفّى
وتصبح بور

وعشقك شئ محيّرني
أسافر بيه لبره الكون
ياخدنى بشوقي ويجيبني
لا انا عاقل ولا مجنون
أسلّم ع الشجر بالإيد
وأكتب ع الورق إسمك
وأفرد ع الطريق تنهيد
ماهو مرّت عليه قدمك
تشوفنى صحابي تستغرب
تقرّب منّي وتطبطب
وناس بتشوفنى تتهرّب
يقولوا م الهوى مسحور

وانا وعنيكي قدّامي
بشوفها كالسما واصفى
عيون الحور على بابهم
في كفّه وتبقي في كفّه
أشوف فيهم شطوط عشقي
ومرسى الحب واللهفه
ما هيّا لوحدها صنعت
من القلب الحجر شاعر
وخلّت نبض إحساسه
فى قلب بحورها بيسافر
وموج العشق بيشيله
ويتمايل مع ميله
ونسمة حب بتجيله
وتتمنى يجيلها الدور

ويسكر قلبي من شفه
كما الجمره وسنان فيروز
وخمرة عطر بنضارة
زهور اللوز
واشوف الورد فوق خدّك
ربيع مصنوع على قدّك
دنا قلبي الملك.. عبدك
بشوقه يفوت جبال وبحور

دنا قلبي النهار عندك
وليل عمري ف جزيرة شوق
منايا أدق باب قلبك
فيفتحلي وياخدني لفوق
لأبعد نجمه ف عنينا
نعيش انا وانتي وحدينا
طيور الحب حوالينا
بتحمينا وتبني السور

دا حسنك ف الوجود آيه
وإسمك غنوه ف لساني
منايا تكوني ويّايا
وقلبك يبقى عنواني
نهاري تكوني شمسايه
وليلى تكوني قمرايه
أنام وتنامي جوايا
ونصحى بزقزقات عصفور

شعر / أحمد سعيد موسى
16/2/2010

باحبك ياللى أشعارك

بتفتنى

سكنت ف قلبى ياأحمد

وف الننى

وأفكارك جميلة كلها

دايما

وشعرك .. من جماله

حقيقى جننى

ألف مبروك ياملك الرومانسية

الراقية جدا وأرجو قبول اعتذارى

لتأخرى فى التهنئة .

السلام عليكم , الشاعر احمد موسي , انا لم أقرأ القصيدة إلا مؤخرا واليوم بالتحديد لأني سجلت في المنتدي من فترة وجيزة , لكني لا أجد ما أستطيع به أن أبرز إعجابي بالقصيدة , إنها أكثر من رائعة , تستحق فعلا وبجدارة أن تكون الفائزة , ليس فقط لشهر واحد وإنما لكل شهر وإلي الأبد . أجمل التهاني .
راندة سعد Very Happy

كل أحبابي وإخوتي هنا بالمنتدى
لا يسعني إلا أن ألثم قدم رياح الشعر التي قادت أشرعتي إلى مينائكم
شكرا لكم جميعا على هذه الردود الوارفة فما أنا إلا تلميذ غرير يستقي الشعر من بديع كتابتكم وينهل من نمير ذائقتكم ..

شكري للجميع
أحمد

» الى شاعرة القصيدة الفائزة بجائزة فبراير 2010
» فِضِل فرعون (القصيدة الفائزة عن شهر إبريل 2010 )
» خمسه وسته تساوى اتناشر ! القصيدة الفائزة يناير 2010
» نخيل الوجد الفائزة بجائزة المنتدى لشهر مارس 2010
» *الْخيْاَل* القصيدة الفائزة بجائزة المنتدى لشهر سبتمبر