كالعادة

موضوع: كالعادة الثلاثاء يناير 05, 2010 7:29 am

و كالعادة

و كالعادة
أنا ... و انتى
مكان واحد
ف وسط الزحمة يجمعنا
عشان نتدارى جواها
و كالعادة
كلامنا بيتولد ساكت
لكنه بيشرح المعنى
بلغوة عنينا فاهماها
و كالعادة
وشوش بتخش ف الصورة
بدون ما تحس توجعنا
نقول الآه
بصوت عالى
بدون الناس ما تسمعنا
و تبقى قلوبنا سامعاها
و بترددها ميت مرة
و كالعادة
مافيش غيرنا
بيستحلى
سنين مرة
مافيش عاشق
قدر يوصل باحساسه لاحساسى
اللى خلانى
أعيد ترتيب معادلاتى
و احطك
جوة أقواسى
فتبقى بعقلك الراسى
ف سجن الانتظار
حرة
مافيش غيرى
قدر يوصل
لكلمة سر أسرارك
و يلمح صورتك اللى الناس
يادوب بتشوفها
من برة
مافيش غيرك
قدر ينفض غباراليأس
عن عمرى
و خلانى أبصى لى
بميت نظرة
و يوهبنى قلم مسحور
أألف بيه
و يبعت لى
بدال الفكرة .... ميت فكرة
و كالعادة
مافيش غيرنا
كيان واحد .. شعور واحد
وروح واحدة
وحلم وحيد مازال شارد
ف مركب عمرنا الشاردة
قصاد الناس نبان هاديين
و جوانا حاجات رافضة ف يوم نهدا
بطول ما اللحظة مش حايينة
و يوم ورا يوم نقول هانت
نلاقى السكة مش هاينة
وأرض فراقنا
كام بانت
و أرض لقانا مش باينة
و مركب حلمنا بتتهجى
خط الموج
ماهيش غرقانة أو راسية
تصادف كل يوم موجة
تحن لها
و ميت موجة تكون قاسية
ف صخر ظروفنا تخبطها
وكل ما نرسم السكة
اللى تنجدها
إيدين غيرنا تلخبطها
فنرسمها ...
ف تتلخبط ...
فنر سمها
ف تتلخبط
فنرسمها
و نرسمها
و نرسمها
ف تتلخبط
و تتلخبط
و تتلخبط
و مهما ظروفنا
تتخبط
و تطول بينا سكتنا
بنفضل برضه ماشينها
وبتصبرنا غنوتنا
اللى ألفناها من بوحنا
( دى مهما الدنيا
هتزود قساوتها
و هتعاند .. و هتغلس غلاستها
نغلس برضه ما يهمش
و هنرخم وهنطنش
و نفضلها كدة عايشين ونستنى
ضرورى ف يوم هنتهنى )
و لو نبعد
ف بين الرنة والرنه
مساحة بوح
و يفضل حبنا بناره
لنا ... جنة
منين ما نروح
لكن لو هنتفارق
ففيه فارق
ساعتها لابد نتدرب
سنين ياما
أنا و انتى
على مشهد طلوع الروح
ـــــــــــــــــــــــــــــــــــــــــ

موضوع: رد: كالعادة الثلاثاء يناير 05, 2010 9:06 am

و كالعادة
يا يوسف مصر ولادَّة
بأروع ناس
يا 100 إحساس
يرجع شعرنا تاني
و نشعر بيه
أمل طارح
أغاني بتحضن الفقرا..
تطبطب ع اليتيم
و تروح على المرضى
تداوي الجرح يا يوسف
فإكتب كل أشعارك على الدنيا
قمر ونَّاس
بنفس الحس يا شاعر
بيدهشنا
بشعره الماس
***
سريعا من وحى قصيدتك
أخوك

موضوع: رد: كالعادة الثلاثاء يناير 05, 2010 11:50 am

عندما عرفتك فى أول مرة وكنت فى بدياتى أسلوبك كان جديد علية تماما ولفت نظرى كثيرا وقلت هو دة الشعر هو بيجيب الكلام دة منين وقعدت أقول يا ترى هقدر أكون زية ولا أية ولا أنا فين بالظبط وحاولت محاولات كثيرة مع نفسى لأصل فى فترة كان التوجية فيها ضعيفا ولكن الأحتكاك كان لة الأثر ولكن الأن عندما وصلت إلى مستوى أعتقد أنة معقول عرفت أنت بتجيب الابداع دة أزاى والوقتى بس فهمت الحكاية ماشية أزاى ف الأول كنت بكون محتارة لكن الأن فهمت وترجمت وأبداعك رائع ودايما بيشدنى وطبعا التفعيلة متمكن منها دة غير الفكرة والمضمون وعايزة أقول أن بكرة لينا كلنا بس لازم نبذل مجهود عشان نحصد وأنت مبدع متميز ولكن ينقصك الظهور فى الأماكن التى تتناسب مع روعة أبداعك ويا ريت تركز ف الحكاية دى الفترة القادمة

موضوع: رد: كالعادة الثلاثاء يناير 05, 2010 2:31 pm

الشاعر الرائع يوسف حسنى
قصيده فى منتهى الروعه والجمال
الله عليك سلمت يداك
كتبت فأبدعت فأمتعت
قصيده متميزه بما فيها من تشيبيهات وتعبيرات
ومضمون اكثر من رائع
مستين الجديد من اعمالك علشان
تمتعنا كمان وكمان
تقبل مرورى وتقديرى

موضوع: رد: كالعادة الثلاثاء يناير 05, 2010 5:19 pm

الشاعر الرائع

يوسف حسنى

اجادتك فى فصحاك لا تقل عن اجادتك فى عاميتك .

قصيده جميله نسجت بأيدى واعيه وطرحت بفكر احتوى

مفرداته النفيسه النادره .

واسمح لى ببعض الملحوظات القليله على تلك القصيده :

انت كتبت .. بلغوة عنينا فاهماها . وهنا تكسر الوزن

فالاولى تكتب .. بلغو عنينا فاهماها او بلغوة عيننا فاهماها

وكلمة .. اللى خلانى تكسر ايضاّ . ورأيى

وهوه دا اللى خلانى .

وكتبت ايضاّ .. ومركب حلمنا بتتهجى خط الموج . ورأيى

ومركب حلمنا التايهه .. بتتهجى ف خط الموج

وكتبت .. اللى الفناها من بوحنا .. ورأيى .. وألفناها من بوحنا

وشطرة .. لكن لو هنتفارق .. ورأيى . وأقولّك لو هنتفارق

الابن الحبيب الشاعر / يوسف

قصيده كتبتها من بحر الهزج وبتفعيلته الجميله { مفاعيلن }

وانا من غيرتى على جمال النص كتبت رأيى وقد يصح

وقد يخطأ . ولكن فى النهايه هو نص فى غاية الإبداع

تقبل منى مرورى وتطفلى على هذا النص ...

موضوع: رد: كالعادة الثلاثاء يناير 05, 2010 6:23 pm

وكالعادة

نشوف مشهد طلوع الروح

نبوح بالسر فين ما نروح

نلاقى الناس بتعرفنا

وعارفة حكاوى خطوتنا

وسكتنااهى ماشية

ولا بتهّدى انفاسنا

قمرها عمره وناسنا

ولا بيطفى ولا يضلم

ده أصله للحبيب سلّم

وهواهلنا وناسنا

رائع ما كتبت يارئع

دمت بكل خير

موضوع: رد: كالعادة الأربعاء يناير 27, 2010 9:23 pm

عاطف الجندى كتب:: و كالعادة
يا يوسف مصر ولادَّة
بأروع ناس
يا 100 إحساس
يرجع شعرنا تاني
و نشعر بيه
أمل طارح
أغاني بتحضن الفقرا..
تطبطب ع اليتيم
و تروح على المرضى
تداوي الجرح يا يوسف
فإكتب كل أشعارك على الدنيا
قمر ونَّاس
بنفس الحس يا شاعر
بيدهشنا
بشعره الماس
***
سريعا من وحى قصيدتك

يا عم عاطف كدة هتاكل منى الجو ...سيبنا نقول كلمتين على قدنا إحنا مش قدك برضه الكبير كبير
أخوك

موضوع: رد: كالعادة الأربعاء يناير 27, 2010 9:38 pm

و كالعاده

اشوفك نجم فالعالى

تقول كلمات وتحلالى

أرددها ف عقلى و

روحى وف بالى

وارجع تانى واعيدها

وجمال المعنى كدا يلالى

الشاعر الخطير يوسف حسنى

دمت بكل جمال وحب

موضوع: رد: كالعادة الجمعة يناير 29, 2010 1:25 pm

الأستاذ /يوسف حسني
نص رائع وجوده وخصوصيه في الصوره
مع تحياتي وتقديرى لك
مع وجهة نظر
إن النص مترهل بنسبه بسيطه جداًوقولك
(أعيد ترتيب معادلاتي
وأحطك جوه أقواسي/
وحتغلس غلاستها)
أقل من النص فنياً
فياريت تمر تاني على القصيده
وأنا معجب بنصك جداً
السلاموني

موضوع: رد: كالعادة الجمعة يناير 29, 2010 2:29 pm

جميله جدا يا ايها الشاعر القدير يوسف حسنى انا استمتعت بيه
تقبل مرورى

موضوع: رد: كالعادة الجمعة يناير 29, 2010 4:39 pm

(((كالعاده)))

يكتب شاعر كلام باحساس***تقرا ليه وتسمع منه ناس
منهم عالم منهم جاهل مغنى***لاكن الكل حاسس معنى
بكلامه الكل فرحان مشدود***اصل قيمته من غير حدود
مع تحيات بنت الصعيد ريمى

» موقف مخز ،،، كالعادة
» كالعادة........... ومضة
» رمضان كريم كالعادة