ترام أم القوافي مساجلة شعرية

ليه كده ؟ طب ليه يازينه ؟؟

كنت فاكرك قال رزينه

ليه بقى رافضه القطار ؟؟


قطر زى الفل باين

له كتير ياما وزباين

كلهم اصلاّ صغار


داخله ليه الداخله ديّه ؟؟

لسّه برضه مفتريّه ؟؟

اعملى حساب الجوار


الترام مشغوله بيه

كل حبه بتداديه

جنبه دايماّ ليل نهار


جيتى بوّظنى الجوازه

والفرح قالباه جنازه

والقلوب ولعت بنار


غصب عنك راح ياخدها

دا الشباب موجود فى عودها

يوم ما شافها الشيب دا غار

جاى مدخّن من عمايلك
سبت شغلى وقلت جايلك
لجل ما نحدد قرار

القطار منسوب لجدى
والترام غاويه التحدى
نفسها تشوف الثمار

والترام فى الجسم فايره
خوفى بكره تبقى بايره
خوفى لايصيبها إنكسار

وانتى جايه تقولى شابه
طب دى عدت سنه حبه
والخدود صابها الصفار

وانتى واقفه فى الجوازه
إيد وفاضيه م الحيازه
يعنى مالكيش ف القرار

قطرنا له كيف يجرّب
الترام . عمّال يقرّب
وانتى لابده ف الكرار

مترو إيه اللى انتى عايزه ؟
تديهولها قال دى جايزه
جايزه مقطوع { العشار } !!

نفسها تلمح عيالها
صدّقت ما القطر جالها
انتى ليه ضد العمار ؟؟

دااحنا ما صدّقنا نفرح
والترام جيبنالها مطرح
فى الجراج من غير جدار

لجل ما ياخدم راحتهم
هيّه { عام } ونشوف ساحتهم
{ جراراتهم } ماليه دار

يانهار ابيض يا ضياء

دااحنا ياابنى اصدقاء

جيت مع ايمان عليّه

هوه ده برضه الوفاء ؟

داانت يومك مش معدّى

يوم حسابك جاى عندى

وانتى يا ايمان حسابك

جاى حتى لو تعاندى