الهدف مش جون (مصر والجزائر)

مشاركتي في المسابقة على هذا الرابط
https://elgendy.ahladalil.com/montada-f3/topic-t7656.htm#72931

https://www.youtube.com/watch?v=iz82R5tBQRc
الشعب كله هتف
والكورة مش في الجون
وفجأة عقله اتخطف
زي ال مسه جنون
رقص وغنى وكشف
عن كل شئ مكنون
بيشجع اللي احترف
واتباع بميت مليون
يا شعب فين الهدف
وانت أسير مديون
وأنين ف قلبك عزف
على صوت أسى وشجون
وحلم عمرك وقف
جوا الشبك مرهون
وجرح قلبك نزف
ومفيش طبيب مضمون
م الهم ريقك نشف
طول النهار مطحون
والحر أمله اتنسف
الله يكون في العون
نص الشباب انحرف
ونصهم مسجون
والقدس رمز الشرف
بايت ف إيد صهيون
والمسلمين للأسف
من كل جنس ولون
عايشين ومن غير هدف
بس الهدف مش جون
لكن دا دين ربنا
كله ف سبيله يهون
حسام خليل