قصيدة " حلم " للشاعر : أشرف عزمى

ليلاتى أحلم ألاقيكِ
تحطى القلب فى عنيكِ
يا ساكنه القلب أتاريكِ
نسيتِ، انك لقلبى فنار.

حلمت بشمعه وبحنَّه
تطيرى بروحى للجنَّه
يدوب شوقنا كده بينَّا
تلاقى القلب بيكِ عمار.

حلمت أكون أنا وأنتِ
شراعك وانتِ مركبتى
ما نرسى ف بر يا أمير تى
ندوب نسكر فى كل بحار.

حلمت، تحسى بألامى
يا عايشه ف كل أحلامى
بروحك اعدى أيامى
واكون بلسم تكونى خضار.

حلمت بشوقى، اكون نسمه
فى وقت الشده، اكون بسمه
وإيد فوق فى السما راسمه
نجوم دايره فى كل مدار.

حلمت أسهر ليلاليكِ
بكاس الحب أسقيكِ
تاخدنى نشوتى بيكِ
أتوه، واشرب ما الاقى نهار

حلمت، أحلم، وأتهنى
ورود تكبر فى بستانَّا
صباح يطلع لأحلامنَّا
ونسقى، بحبنا الأنهار.

حلمت، اكون انا ضلك
تتوه الروح أكون خِـلك
تلاقى القلب، يفرش لك
فى روحه بريشه، م الأطيار.

حلمت، اكون انا الفارس
فى حلم ليلاتى متوالس
فى قلبك أبقى انا دارس
خبايا حروفى، والأسرار.

حلمت، أعيشك أتحمل
دلالك وأنتِ من الأول
بروحك فىَّ، تتجول
وشهدك، يمحى كل مرار

حلمت، أطير على غصنك
وأغزل عشى، فوق حجرك
ولما يبان شعاع فجرك
أروح اقطف لك، الأزهار.

حلمت، معاكِ أكون درويش
فى ساحة مجذوبينك اعيش
تطير روحى، وانا ما داريش
وفى رحابك أقول أذكار.

حلمت، معاكِ يا حلوه
كلام فى القلب صار غنوه
نعيش أنا وانتِ فى خلوه
بروحى أحميكِ، م الغدار.

حلمت، اكون انا الربان
وفى بحورك أكون حيران
وتنسى مركبى الشطآن
وأعيش مستحمل الأقدار.

حلمت، أنام كده فى أمان
لا أخاف من بوم، ولا غربان
وهاملا بنورك الأزمان
بحبى تكونى، م الأحرار.

حلمت، كتير انا وكتير
يكون القلب ليكِ أسير
وروحك فى سمايَّ تطير
وحلقى يهاجر الصبَّار

حلمت، انى اكون حلمك
تناجي فى طيفى، من قلبك
أكون زى النسيم، جنبك
تلاعب روحك الأشعار.

حلمت، أطير فى كل صباح
وفى عيونك أنام، وارتاح
ويشفينى، نسيم فواح
وأعشق جنتك، لو نار.

حلمت، بحبك أتعايق
وويَّا رضاكِ، اكون رايق
وأكون فى هواكِ، أنا فايق
ويصبح قلبى، م الشطار.

حلمت، كتير وانا صاحى
فى عشك تكتر افراحى
بكلمه تداوى، فى جراحى
وقلبى، تخضّره الأمطار.

حلمتك، ساكنه فى جوارحى
وفى الأحزان لقيت فرحى
ومن نبعك يفيض طرحى
يزغلل طيفك الأنوار.

حلمت، اعشق تراب أرضك
بلمسة شوق، يطيب مرضك
وأحلف لك، أصون عرضك
وفى حماكِ، أكون جبار.

حلمت، اكون على بابك
وروحى تاخدنى لرحابك
بكلمه، بنظره، لاحبابك
يكون قلبى، أنا المختار.

حلمتك، ليلى ونهارى
يا عايشه جوَّه أفكارى
وشمسك تملا فى ديارى
تطول فى ساحاتك الأعمار.

حلمت، بإنى محبوبك
يبل ف روحى سرسوبك
وشوقى خطاوى فى دروبك
وروحك شاقه كل مسار.

حلمت، تكونى فى العالى
وطيفك يملا فى خيالى
ومين غيرك على بالى
يا غاليه،يا أشطر الشطار.

حلمت، بشهدى أرويكِ
وأخضر فى براريكِ
نخيل يسكن أراضيكِ
وتاكل روحك الجُمَّار.

حلمتك، تطرحى مولود
يحول دمنا لأسود
ياخدنا ف يوم، نعدى سدود
وينزع من جتتنا العار.

حلمت، تكونى فى عينيَّ
بحبك تنسجى ضيه
تنور فرحه منسيه
وتاهت منا فى الابيار.

حلمتك، دم شراينى
ينور فكرى يهدينى
يكون سجاده، لجبينى
يا خدنى، نكمل المشوار.