مع الستات

موضوع: مع الستات الإثنين أكتوبر 05, 2009 5:59 am

مع الستات

وأسمحلي
أقولك أني مش قصدي
فست جمعها ستات
وستة جمعها ستات
ومين ينسى رقم ستة
دة أصبح مادة للكتابات
ولسة حاقول عن الستات

في ست أيام هزمونا
وجرونا.. وعرونا
وعشنا سنين أسى وأهات
وكانت نكسة من النكسات
ولسة حاقول عن الستات

وست سنين كانت فاصل
مابين العار وبين التار
وعشنا والأمل جبار
وعدينا من الأزمات
ولسة حاقول عن الستات

في ست ساعات ضربناهم
ووهم القوة راح في فشوش
وبالنيات هزمناهم
وعرفناهم
بإن جيوشنا أقوى جيوش
وإن احنا كلام وسكات
ولسة حاقول عن الستات

في ستة أكتوبر كان النصر
ويومها العشة صبحت قصر
طردنا الحسر.. وكانت مصر
بترفع راسها مـ النكبات
ولسة حاقول عن الستات

ومين ينسى
صاروخ كان أسمه سام ستة
ضرب بارليف .. بشكل مخيف
وقال لعزولنا بلا تخاريف
وفضونا من أساطيركم ومـ المتاهات
ولسة حاقول عن الستات

خلقنا ربنا في ستة من الأيام
وحملنا بايد رسله صُحف وكلام
ولكن ننسى إن إحنا من الأموات
سواء رجالة أو ستات
ومش باحكى عـن الستات
................................

ملحوظة: تحية لشعبنا وجيشنا المصري في الذكرى الـ 36 لحرب 6 أكتوبر

الله على جمـــــــال وخـــــــــيال ودلال .. ستاتك

إيه اللفـــــــــة والتورية للمعــــــــانى .... دى

العنـــــــــوان ..شـــــــــدنى .. وكنت رايحــــــــة أقرا قصيدة

ومستفــــــــــزة للرد والدفاع عن الســــــــتات ألاقـــــــى موضوع تانى خالص

وطــــــــــنى وإيمانى يدعو للتفكـــــــــــير .. برافو يا أستاذ / طارق

ياريت آخــــــــر بيت يتصلـــــــــــح فيه الوزن حتى يستقيم مع باقى القصيدة كأن تقول مثلا .. مثلا

وأنا مِِِِِِِِِِِــــــــش باحكــــــــى عن ســـــــتات .

دمت مبدعــــــــــــاً

وداد الهــــــــــــــوارى

الرائع طارق منيب

جميل جدا أنك تصيغ النص

وتجعل له أسم بفكره معينه

ليتخيل القارئ بأنك بتتكلم عن الستات أى الحريم

عموما فى حين أنك بتتكلم فى نقطه تانيه خالص

وهو كل ما تم أنجازه فى ست أيام

فكره جميله اشكرك عليها ايها القدير

دمت بكل خير وحب

موضوع: رد: مع الستات الإثنين أكتوبر 05, 2009 1:24 pm

وداد الهوارى كتب:: الله على جمـــــــال وخـــــــــيال ودلال .. ستاتك

إيه اللفـــــــــة والتورية للمعــــــــانى .... دى

العنـــــــــوان ..شـــــــــدنى .. وكنت رايحــــــــة أقرا قصيدة

ومستفــــــــــزة للرد والدفاع عن الســــــــتات ألاقـــــــى موضوع تانى خالص

وطــــــــــنى وإيمانى يدعو للتفكـــــــــــير .. برافو يا أستاذ / طارق

ياريت آخــــــــر بيت يتصلـــــــــــح فيه الوزن حتى يستقيم مع باقى القصيدة كأن تقول مثلا .. مثلا

وأنا مِِِِِِِِِِِــــــــش باحكــــــــى عن ســـــــتات .

دمت مبدعــــــــــــاً

وداد الهــــــــــــــوارى

الأخت العزيزة الأستاذة/ وداد

السلام عليكم ورحمة الله وبركاته
لحظة جميلة بالنسبة لي أن تنال القصيدة منك كل هذا الإعجاب
وإن إعجابك بالقصيدة كامل ماعدا التغيير اللي طلبتيه
وأرجو أن تقومي به بنفسك إن أمكن
أو أن يقوم أحد ممن له صلاحية التعديل بتعديلها وفقاً لطلبك
طبعاً جيلنا لا يمكن أن ينسى الفترة من 67-73
والدعايات الكبيرة للجيش الذي لا يقهر
وإن حتى القنبلة الذرية لا يمكن تحطم شهر بارليف
لا زلت أذكر حرب 67 و73 وكأنهم أمس ويمكن أكثر 73 لأني كنت أكثر وعياً من ناحية السن
لو قلتلك بالتفصيل أني كنت راجع من المدرسة في الفترة المسائية
الساعة الخامسة.. ولم أسمع شادية تغني "والله يازمن مابايدينا زرعنا الشوك"
لأن التمثيلية ساعتها كانت شغالة في الراديو يومياً
وفاكر كنت لابس أيه
وقابلت صديق لي بيقولي الحرب المنتظرة قامت ورفعنا العلم على الضفة الشرقية
حيث كان البيان الخامس قد أُذيع
ولا تتصوري فرحتي وسعادتي كأي مصري
القصيدة تعبير عن مشاعري كمصري وعربي ومسلم بهذه الذكرى الخالدة
والغريب في القصيدة أني برضه أتكلمت عن 6 ستات بدون قصد
ست أيام
ست سنين
ستة أكتوبر
ست ساعات
سام ستة
خلق الدنيا في ست أيام
سأترك لك أو المشرف التعديل حسب رغبتك
وسعيد جداً أنك لم تبدي أي تحفظ عليها سوى هذا التحفظ
وتقبلي خالص مودتي وخالص شكري وتقديري لمرورك وتعليقك

أخوك
طارق منيب

موضوع: رد: مع الستات الإثنين أكتوبر 05, 2009 1:41 pm

احسنت استاذ طارق منيب فيما خط قلمك الباهى الواعى

دمت بكل خير

تقبل مرورى

موضوع: رد: مع الستات الإثنين أكتوبر 05, 2009 1:43 pm

الأخت الأستاذة عزة
العنوان حيساعدني كتير في أن كل ستات وبنات المنتدى حيخشوا يشوفوا أنا باقول إيه عنهم وبكدة أضمن دخولهم كلهم
كمان كل الرجالة المستحلفين للستات حيخشوا علشان يشوفوا أنا باقول أيه عن الستات
وبكدة ضمنت إن عدد كبير جداً من أعضاء المنتدى حيقرأ القصيدة
ولكن حيلاقوا شئ مختلف عن اللي توقعوه
خالص شكري وتقديري لمرورك وتسجيل إعجابك بالقصيدة
أخوك
طارق

موضوع: رد: مع الستات الإثنين أكتوبر 05, 2009 1:48 pm

هناء سعيد كتب:: احسنت استاذ طارق منيب فيما خط قلمك الباهى الواعى

دمت بكل خير

تقبل مرورى

بعض ماعندكم ياأستاذتنا الكبيرة وقلمي حيفضل ضئيل بالنسبة لقلمك
وسعيد جداً بتعليقك ومرورك
أخوك
طارق

موضوع: رد: مع الستات الإثنين أكتوبر 05, 2009 8:12 pm

انت مبدع بجد يا طارق يا منيب

موضوع: رد: مع الستات الإثنين أكتوبر 05, 2009 8:46 pm

أستاذ / طارق منيب الشاعر المترجم .. الشـاعر

أشكرك على هذه الثقة الغالية التى أسعدتنى

وأحـــــــــيل أمــــــــر تعـــــــــديل الشطرة الأخــــــــــيرة

إلى

الأســـــــــــتاذ والشــــــــاعر الكبير / عادل عوض ســـــــــــــند

نائب مدير عام المنتدى

والمشـــــــــــرف على العامــــــــــية

ليقــــــــــــوم بهــــــــذا التعــــــــــــديل مشكــــــــــــــــــوراً

لك أمنياتى الطيبة بالتقـــــــــــــدم والمزيد من النجاحات .

وداد الهــــــــــــــــوارى

موضوع: رد: مع الستات الإثنين أكتوبر 05, 2009 9:23 pm

السلام عليكم .. مجرد راي

الاستاذ / طارق

احترامي وتقديري

اكيد بعد ما قرات التعليقات الرائعة من الافاضل والفاضلات

مبقاش فيه شيء اقدر اقوله غير

الله علبك

بالفعل اسمتعت بالفكرة , والموضوع , وست صفحات من التاريخ

أعدت التذكير بها

وفي ايام احتفالنا بأعياد التحرير

كل اكتوبر ومصر وابنائها في خير ونصر من الله

اشكرك

وللجميع تحياتي

مع الستات 56845

بجد أكثر من رائع صياغو وفكرة وجمال فى المضمون من احلى ماكتبت يا خالى أنت رائع دائما قلبا وقالبا مبسوطة جدا باللى أنت كاتبة حلوة أوى دلالاتك لرقم ستة الفكرة قوية جدا جدا وأنت فى طريقك للتميز أيها الشاعر الجميل صاحب دلالات رقم ستة

afro

أستاذتي الكبيرة الأستاذة وداد
إن لم أثق بأستاذتي الكبيرة اللي هزت مشاعري في حقك وستارة كروشيه
ولخبطت مشاعري في ثورة.. وخلتني كأن باحل الكلمات المتقاطعة عشان أفك رموز القصيدة
وقلبت ليلي لنهار في الليل سكن
وخلته مش سكن
حاثق في مين
دة غير الحياد والموضوعية والنقد الجميل بدون تجريح
لازم طبعاً أثق في رأيك واقولك عدلي أنتي
خالص مودتي وتقديري وتأكدي إن ثقتي في محلها (أنا متأكد زيك وأكثر)
أخوك
طارق منيب

أخي العزيز الأستاذ/ ضياء
دائماً تبدأ كلماتك بمجرد رأي
ولكنها عندي أكبر بكتير من كدة
وصدقني باكون سعيد جداً بمرورك على أي عمل لي
ورأيك وتقييمك اللي باعتز بهم كثيراً
خالص مودتي وتقديري
أخوك
طارق منيب

أبنتي العزيزة رشا
أي نجاح لي هو نجاحك أولاً وكذلك خالك منير
عشان أنتي اللي شجعتينا ندخل هذا المنتدى الجميل
وأنا سعيد جداً أنها عجبتك
وإن شاء الله أقدم مايسعدك ويرضيك
خالك
طارق

أخي العزيز منير
شكراً لمرورك وتعليقك
ومبروك أنهم صنفوك عضو مميز
وشئ رائع جداً أنك تحصل عليها بسرعة رغم إن وجودك في المنتدى زمنه قصير
في انتظارك في السعودية بفارغ الصبر
أخوك
طارق

الشاعر الجميل والاخ الحبيب
طارق منيب
انا آسف لتأخرى على التعليق على هذه القصيده المفارقه
دخلت عليها وتخيلت ان قصيدتك عن الستات وعن أفعالهن
ولكن وجدت مفارقه جميله ومعالجه لكلمة { ستات }
يوم سته .. وست ساعات .. وسام سته ..
هذا علاوه على الحرفيه فى صياغة القصيده والتمكن من الموضوع
كل هذا اضاف على العمل روعة وتألق مما جعلك ترتقى وتأخذ مكانك
الطبيعى بين كبار الشعراء .
وانا كنت متابع التعليقات والردود بينك وبين الاخت الشاعره وداد الهوارى
وارجو ان تقبل تعديلى للشطره الاخيره من النص تنفيذاّ ارغبتك .
نص جميل يا استاذ طارق . وارجو ان تحاول جاهداّ ان تحافظ على هذا المستوى
كل التقدير والود ايها الشاعر الجميل ...

أخي الحبيب وأستاذي الكبير/عادل "عدول"
السلام عليكم ورحمة الله وبركاته
اعتذارك في محله فأنا كنت في انتظارك وانتظار ردك الجميل كالعادة.. ولكنك خيبت ظني في شئ فقد انتظرت منك تعليقاً طريفاً مثل كل دي ستات ياحاج طارق ..أو كنا فاكرينك طيب.. ولكن الرد كان مش شقي كعادتك
أخي الحبيب .. سعيد إن العمل عجبك.. وفخور بتعديلك للعمل وفقاً لرأي الأستاذة/ وداد الهواري
وإذا العمل اشتهر حاسجل أسمكم كمساعدين لي (مساعدين؟! شوف البجاحة)، أي تقدم كان بفضل توجيهاتكم واحتضانكم لي ونقدكم الموضوعي الهادف الحريري .. نعم حريري .. لأنكم بتوصلوا كل اللي أنتم عايزينه بدون تسبيب إحباط للواحد.. ودة شئ جميل
وكل ماأريده في الفترة القادمة إن شاء الله أن انتقل من دور الأسطى للمهندس.. فأنا شاعر بالفطرة .. ولكن ليس لي أي دراسات أكاديمية في هذا الصدد .. وحاحاول أستعين حتى بمدرس لغة عربية هنا لتدريس بحور الشعر وأي أشياء أخرى ممكن تفيدني .. لأنكم كبرتم الموضوع في دماغي.. بعد ماكان لا يزيد عن كونه وسيلة تنفيس..
خالص الشكر لردك الجميل.. ولا زلت أنتظر رد الأستاذ/ عاطف وتعليقات جميع الزملاء اللي تفاعلت معهم
خالص مودتي وتقديري .. وأتمنى أن نلتقي في أجازتي القادمة من 19 نوفمبر إلى 2 ديسمبر إن شاء الله.. ولو فيه ندوة في الاسكندرية في الوقت دة حتكون موجود فيها لازم أحضرها
أخوك
طارق

موضوع: رد: مع الستات الخميس أكتوبر 08, 2009 10:26 pm

لاحول الله
يعنى ولا كده عاجب ولا كده عاجب
طب اعمل ايه يا عم طارق علشان ارضيك ؟
هات ودنك علشان ما حدش يسمع ..
يعنى عايزنى اقول على صور الستات اللى عندك فى الدرج
ولاّ نمر التليفونات اللى الاجنده الصغيّره البنى ؟
ها .. ما ترد ؟
ياللا خلّى الطابق مستور .. انا موطّى صوتى علشان ما حدش يسمع
طروقه حبيبى ياريت تقطع الصور والاجنده
علشان ربنا يتقبل منك العُمره ..
رغم انك عاملها فى شرم علشان الجو كان حر فى السعوديه
عموماّ انما الأعمال بالنيات
ههههههههههههههههههههه
الى اللقاء فى نوفمبر ان شاء الله ...

موضوع: رد: مع الستات الجمعة أكتوبر 09, 2009 12:57 am

عادل عوض سند كتب:: لاحول الله
يعنى ولا كده عاجب ولا كده عاجب
طب اعمل ايه يا عم طارق علشان ارضيك ؟
هات ودنك علشان ما حدش يسمع ..
يعنى عايزنى اقول على صور الستات اللى عندك فى الدرج
ولاّ نمر التليفونات اللى الاجنده الصغيّره البنى ؟
ها .. ما ترد ؟
ياللا خلّى الطابق مستور .. انا موطّى صوتى علشان ما حدش يسمع
طروقه حبيبى ياريت تقطع الصور والاجنده
علشان ربنا يتقبل منك العُمره ..
رغم انك عاملها فى شرم علشان الجو كان حر فى السعوديه
عموماّ انما الأعمال بالنيات
ههههههههههههههههههههه
الى اللقاء فى نوفمبر ان شاء الله ...

أهو كدة.. أنا دلوقت مقتنع إن أستاذي عدولة علق ولكن قبل كدة حاسس إن فيه حاجة ناقصة

موضوع: رد: مع الستات الجمعة أكتوبر 09, 2009 10:23 pm

عادل عوض سند كتب:

[center]الشاعر الجميل والاخ الحبيب
طارق منيب
انا آسف لتأخرى على التعليق على هذه القصيده المفارقه
دخلت عليها وتخيلت ان قصيدتك عن الستات وعن أفعالهن
ولكن وجدت مفارقه جميله ومعالجه لكلمة { ستات }
يوم سته .. وست ساعات .. وسام سته ..
هذا علاوه على الحرفيه فى صياغة القصيده والتمكن من الموضوع
كل هذا اضاف على العمل روعة وتألق مما جعلك ترتقى وتأخذ مكانك
الطبيعى بين كبار الشعراء .
وانا كنت متابع التعليقات والردود بينك وبين الاخت الشاعره وداد الهوارى
وارجو ان تقبل تعديلى للشطره الاخيره من النص تنفيذاّ ارغبتك .
نص جميل يا استاذ طارق . وارجو ان تحاول جاهداّ ان تحافظ على هذا المستوى
كل التقدير والود ايها الشاعر الجميل ...

الأخ الشاعر ( المفتون بمصر ) / أصل وحشنى أناديك باللقب ده

أشكرك يا سيادة نائب المدير العام للمنتدى ........ يانهار مش باين له منصب

عرفت ليه أنا باكره الكراسى ؟! مش كرسى عاطف بتاع المساجلة بس ؟!

العنــــــــاوين يا آخى بتبقى طويلة قوووووى.

أنا أشكرك لــ إستجابتك لطلبنا الأخ الشاعر المترجم / طارق منيب ، وأنا ونرجو

رغم كثرة مسؤلياتك أن تنظر بعين العطف والبت بسرعة فى الأمور المستعجلة

وأن لا تكشف أسرار الشاعر طارق منيب أكتر من كـده ... وكأنك ما صدقت

ما تعرفش ( أن الله حليم سـتَّار )

تحياتى

وداد الهــــــــــــــــــوارى

[/center]

موضوع: رد: مع الستات الجمعة أكتوبر 09, 2009 10:34 pm

يا وداد يا أختى
هوه اللى نكشنى ..
{ يا قاعدين يكفيكوا شر الجايين }
مش عايز يقتنع بإننى كاتم اسراره وانى الأمين الوحيد عليها
دا لسّه واحده سألانى على رقم تليفونه . وكتبته لها .
ما اعرفش بتقولّى مش عارف موضوع جواز عرفى ولاّ إيه ؟
يعنى حاجه زى كده .
بس انا ما إتعوّدتش أفتش اسرار حد
وخصوصاّ أخويا وحبيبى طارق ...

موضوع: رد: مع الستات الجمعة أكتوبر 09, 2009 10:43 pm

عادل عوض سند كتب:

[b][center]يا وداد يا أختى
هوه اللى نكشنى ..
{ يا قاعدين يكفيكوا شر الجايين }
مش عايز يقتنع بإننى كاتم اسراره وانى الأمين الوحيد عليها
دا لسّه واحده سألانى على رقم تليفونه . وكتبته لها .
ما اعرفش بتقولّى مش عارف موضوع جواز عرفى ولاّ إيه ؟
يعنى حاجه زى كده .
بس انا ما إتعوّدتش أفتش اسرار حد
وخصوصاّ أخويا وحبيبى طارق ...

طـــــــــبعا ... ما أنا عارفة ..

ووقع مع مــــــــــين ؟! دا أنت حـتى ولا عايز توديه فـــــ ...... ولا حاجة

ولا عايز تجيب عاليها ... واطيها .. ولا حاجـــــــة ...... ولا عايزه ينام

ع السلـــــــــــم زى صــــــــــاحبك إياه ......... ولا حاجــــــــــــة

ولا عايزه يقول : حـــرَّمت أهـــــــــــزر معــــــــــــاك .. ولا حـاجة

هو أنت بتعمـــــــــــــل أى حـاجة ........ دا انت طفل برىء من القتل

العمد والترصـــــــــد ........ يكفينا شـــــــــــرك يا آخــــــــــــــــى

هه كفــــــــــــــاية عليك كـــــــــــــــده يا طارق يا منيب ولا عايزه المرة الجاية
ِ

يقولك أســــــــامى عيالك منها !!!!!!

وداد الهــــــــــــــــــوارى

[/b][/center]

موضوع: رد: مع الستات السبت أكتوبر 10, 2009 2:04 pm

اللهم ماأكفني شر أصدقائي، أما أعدائي فأنا كفيل بهم
أنا اللي جبت دة كله لنفسي
أنا اللي جبت دة كله لنفسي
أنا اللي جبت دة كله لنفسي
وصعب عليه إن أخويا عادل يمر عليه بهدوء وسلام وبدون تحقيق خسائر في الأرواح والمعدات ( بمناسبة 6 أكتوبر)
طبعاً باعتذر عن التأخير في الرد علشان الاتصال مع المحامين وبعد كدة طلعت على السفارة المصرية عملت توكيلين توكيل لمحامي قضية الخلع، وتوكيل آخر لقضية الطلاق.. بسبب كلامكم
دة غير إن الستات كلهم حاصروني زي رشدي أباظة في فيلم الزوجة رقم 13
دة غير عيالي عايزين يتبروا مني وبنتي الكبيرة قالتلي خسئت يازير النساء

باطمنكم
لا يمكن تحصل حاجة من دي أبدا
ولسبب بسيط إن طول عمري مستقيم والحمد لله
وأسرتي عارفني كويس
ولكن دة مايمنعش إن أنبه أخويا عدولة لشوية حاجات
الأجندة أو النوتة البني دي أسلوب قديم ولازم تواكب التقنية
فلما يكون فيه أسماء ستات سجلها على الموبايل وعدل الأسماء
إيمان خليها أيمن.. على خليها علاء وهكذا
والاحتفاظ بالصور كمان.. المجرم غلط يحتفظ بدليل جريمته
الكلام دة من أخوك البرئ.. صدقني مش هزار أنا طول عمري مستقيم جداً.. ولو تعرفنا على بعض عائلياً يوم ما .. وإن شاء الله دة حيحصل.. حتعرف من المدام أنها بالرغم من نفس الحتة عمري حتى مارفعت عيني عليها.. واتجوزتها لطيبتها وأخلاقها واخواتها كانوا أصدقائي.. وعشان كدة باقولكم كلامكم كله فشنك
كمان لما تحب توشوش حد مايكونش على صفحات المنتدى.. فالوشوشة تكون على الهوا في الإذاعة علشان الخراب يكمل ..دة غير باعتب على الأخت وداد أنك شاركتي حبيبي عدولة في كلامه .. وكان المفروض أنك تصديه على الأقل في المنتدى وبنا وبين بعض مش مهم
أدام الله لكم البسمة.. وأدخل السرور في قلوبكم دائماً زي ماضحكتوني من قلبي
أخوكم
طارق

موضوع: رد: مع الستات السبت أكتوبر 10, 2009 3:31 pm

والنبى خبره يا طروقه
والتقنيه اللى انت بتقول عليها بقت مفهومه جداّ
فالموبايل اقرب واقوى دليل . يعنى ما ينفعش
انما الأجنده تبقى فى المكتب بس .
ده اللى انت علمتهولى . وحكاية امينه تتكتب امين دى قديمه
{ والستات كلها هرشتها .. يعنى مفقوسه }
واوعى تقول .. اللى انا علمتهوله بيقوله ..
انت عارف انا ما احبش افتن على حد ..
ياللا .. كل واحد منه لله ..
{ هات ودنك .. انا عارف انك مربّط دلوقتى }
لما تخف وتشفى يعنى على نوفمبر .. نتقابلوا
الف سلامه عليك يا حبيبى .. تقوم بالسلامه ان شاء الله
قلبى معاك والى لقاء ...

موضوع: رد: مع الستات السبت أكتوبر 10, 2009 5:05 pm

حبيبي عدولة
مش عارف ليه نكشتك.. وانت من غير نكش قضية.. أيش حال لو حد نكشك
أنا الدبور اللي زن على خراب عشه فعلاً
ولما كنت مسالم معايا لأول مرة ماهانش عليه
عموما ماتحرمش من دمك الخفيف ( دي حتة نفاق بس علشان أشتري سكوتك)
أخوك
طارق

» مع الستات - طارق منيب " ملحمة تاريخية مع الستات "
» مع الستات-ستات لاتنسى في ذاكرة طارق منيب
» الستات انواع
» مع الستات-معدلة
» شفت الستات اشكال وانواع