مع الستات - طارق منيب " ملحمة تاريخية مع الستات "

ماهيش ستات ولا تحدي
انا فعلاً مانيش قصدي
فــ ســــت لما تجمعها حتلقى جمعها سـتات
وستة برضه تجمعها حيبقى جمعها ستات
ومين ينسى رقم ســتة ده أصبح مادة للكتابات
واسمعلي وانا أحكيلك
‏ عن الستة دي مـ الستات
‏..................................
فبدايتنا في عام ستة
وكنا في مصرنا حتة
ومحتلين ومذلولين فحاكموا جدودنا الفلاحين
ضمير نساي في دنشواي شنق أموات جلد أولاد
ومين يقدر يقول لأ .. ده كان الظلم بشكل آهات
وليه تبكي وليه أبكي
دي أول ستة في الستات
..................................
في عام الستة والثلاثين
جدودنا صعايدة وفلاحين
في ثورة وصولة بنكسب جولة في معركة صعبة مـ العركات
بلادنا التابعة خلاص مش طايقة وصاية وتبعة ولا سلطات
طلبنا معاهدة ليها معنى .. طلبنا النور كفاية ظلمات
وخوضنا بعدها جولات
ولسة كلامي عـ الستات
..................................
في يومنا السادس والعشرين
في عامنا السادس والخمسين
أبو الإيام وأبو الأعوام فيه شفنا النور يشق ظلام
صحينا مـ النوم وقولنا ياقوم كفاية أوهام كفاية أحلام
تعبنا كتير من الحنيا لقينا ضهرنا بينقام
وأممنا قناة الأحلام
في كذا ستة من الستات
..................................
في نفس العام.. لقينا إجرام
وطغيانهم على الغلبان
ثلاثة أتغاظوا وقامولنا وكنا لوحدنا بطولنا
ساقوا الطغيان على الغلبان وكان النصر مـ الرحمن
فقاموا انسحبوا واتراجعوا وكان النصر للجدعان
واداروا ورا الستات
وستتوا ستة مـ الستات
..................................
في ست أيام هزمونا
وجرونا وفضحونا ‏
وكنا في شهرنا السادس وعشنا سنين نكد كابس
ووش الشعب بقى عابس ليوم النصر يتنافس
وعشنا ما بين أسى وأهات وكانت نكسة مـ النكسات
وبالطبع بأكدلك
دي أوحش ست(ة) في الستات
‏..................................
وست سنين كانت فاصل
مابين العار وبين التار
وعاش القط ف ايدين فار ودق فـ نعشه ميت مسمار
كتبنا ملحمة أشعار حلمنا والأمل جبار
وعليت راسنا ورفعنا في راية شعب مـ الأموات
وقلبي حبها جداً
ودي كت‎‎‏ ست(ة) مـ الستات
‏..................................
في ست ساعات ضربناهم
ووهم القوة راح فـ فاشوش
وبالنيات هزمناهم وعرفوا إن أحنا أقوى جيوش
وان المصرى كان صابر وإن الصبر ربى وحوش
وإن الصمت كان محنة وإن أحنا كلام وسكات
وكانت فتنة بجمالها
وكانت ست(ة) مــ الستات
‏..................................
‏ فى ستة اكتوبر كان النصر
ويومها العشة صبحت قصر
طردنا الحسر‏ وعاشت مصر سعادة وفرحة مالهاش حصر
سمعنا الدنيا تتكلم تقول دي بلدنا مجد ونصر
وعزة مصر كات يومها ورفعت راسها مـ النكبات
وصوتنا وصل الكلمة
وكانت أجمل الستات
‏..................................
ومين ينساك ياسام ستة
ده أنت في قلبنا حتـــــــة
فسام ستة كان أقوى صاروخ هدم بارليف وجابله شروخ
وقع جيشهم وكان بيدوخ لقى نفسه كمان ملبوخ
وفرق جمعه للأشتات صحي وفاق تاني من الخرافات
وفكر تاني مين إحنا
ضرب أخماسه فـ الستات
‏..................................
وست سنين فاتوا ومروا
على ولادنا في يوم عبروا
فنالوا بعد ما صبروا وعادت سينا بقدره
نتاج لمعاهدة عليها مقايضة في عهد رئيس كان أسمه سادات
فرحنا بس فرحتنا ماكملتش بدون شروحات
ففرحتنا في رجوع القدس
ساعتها تزغرط الستات
..................................
وستة أكتوبر جه تاني
وصوته عالي حياني
يقول مش موسى ده أنا فرعون وقادر أني أهد الكون
ماأصله كان شايف نفسه وبغروره صبح مجنون
لقى أجله وعمره فات فـ لحظة انضم للأموات
وساب في ضله يحكمنا
وكانت خاتمة الستات
‏..................................
وست سنين كمان عدوا
بحكم العدل احتكموا
وعادت تاني لينا طابا.. ورجعت لينا أوابة
وضافت بسمة على شفة كانت دايبة من التكشير
ولكن فرحنا قصير ياريت نفرح تمللي كتير
تيجي الدمعة من الكبوة
تبكي رجال كمان ستات
..................................
فـ ست أيام خلقنا الرب
وحملت رسله كلمة حب
ولكن لسة ولاد العم وجودهم بيننا أكبر غم
نقول ياأخوانا اتلموا نلاقي الغم مابيتلم
يارب يغوروا دول أوغاد سواء رجالة أو ستات
ومتهيألي مـ الحكمة
بلاش أحكي عن الستات
..................................

» مع الستات-ستات لاتنسى في ذاكرة طارق منيب
» بيرم منيب يعارض بيرم سند "مهداه للرئيس مرسي - طارق منيب
» هي كده.. لأ مش كده- طارق منيب
» خطر ..قطر- طارق منيب
» حرب!!!!- طارق منيب