عبوديه فرخه

فرخه في عصمة فرارجي من الفرارجيه

شافت معاه المذلة والعبودية
عشان لا عنده نظر ولا عنده حنيه
لما زاد غلبها كاكت وقالتلي
ا أعتقني يا مفتري واكسب ثواب فيا
عمال بتحشر في بطني طوب ورمل وعيش
بشويش هتلوح رقبتي قلتلك بشويش
خليت عينيا بقت من قسوتك شيش بيش
وحرارتي زادت قوي من النفخ والتطييش
انا يظهر ان الدور ده بلعت حته خيش
ياعم حاسب بقي حوش جردل الفته
متقربوش جنبي ولا تزنقوش حتي
وابعد كمان البتاعه اللي اسمها قته
وان كان ضروري الغدا ارجوك تبنجني
عشان مشوفش اللي راح بحصل ويتعبني
ياناس قولوله اختشي كل الخيار ده لمين
دنا روح خالقني اللي خالقك طيرضعيف مسكين
وبحس زيك وبشعر انا موش جماد او طين
والله يوم لاندبح لادعي عليك دعوة
واشكي لرب السما ظلم البني ادمين
همدت جسمي اللي طول عمري اللي معاييشي
وصبغت عرفي اللي كان احمر طرابيشي
وحبست دمي ما بين جلدي وبين ريشي
وحصالتي تعبت قوي وتعبت قولوني
والكل يا مفتري حصل نخاشيشي
يا سيدي ارحم شويه جبتلي الكافيه
والكل كرها مخلي معدتي دافيه
زهقت منك ومن اكلك ومن ظلمك
موش عاوزة اكل لا هو الاكل بالعافبه
وحيات ابويا اللي مات من قسوتك مقتول
أمي اللي شافت غداك اتشنجت علي طول
اختي اللي ماتت في ايدك موتة المغلول
ا ان انت ظالم واخرتك سوده
سيب الطمع والجشع وامشي في طريق معدول
سلمت امري وامرك بس للرزاق
ادبح في شخصي الضعيف وانفخني كيف تشاء
ا أنفخ في بطني وعبيني زلط حتي
ايه يعني هتقل شويه
ماهو كله في الفته