كرسي عاطف

موضوع: رد: كرسي عاطف الأحد أغسطس 23, 2009 8:37 pm

عادل عوض سند كتب:: آه .. ياخوفى م المنصه
بفتكرها
فجأه تيجى فى حلقى غُصّه
بس إنت .. شكل تانى
ضيف وكامل بالمعانى
والمنصّه حتبقى خاصه
*******
راح نحط طابور حراسه
م المزز اللى جايبهم
واللى راح يضرب رصاصه
تلقى سهم الموت صايبهم
*******

واوعى تحمل هم كرسى
جيبتلك كرسى عموله
م الحديد صانع جنابه
والرجول حتشيل حموله
يعنى لو حتكح كحه
راح تقع منه الصاموله
تلقى نفسك تحت واقع
اصله مقلب عامله { عبده }
باتفاق مع أخ { دُوله }

المزز توجع لى درسى
يا أبو عادل بس نفسى
و اليتيم مشتاق لهمسه
من عيون الحلوة نانسى
حط هيفا ف الحراسة و
حط روبي ، تزيد حماستى
راح أقول أشعار جميلة
حتى لو أدت لحبسى
طول ما واحدة جميله جنبي
هاتفرد و أقول و امسِّي
و الكراسى موش ضرورى
الوقوف يفرد لى لبسي
و أوعوا تنسوا تجيبوا كولا
و إن نسيتوا هاتوا بيبسي
و السجاير موش عاوزها
بدلوها و هاتوا شيبسي
أنا قلت اللى ف ضميرى
يا حبايب .. ده ف نفسي
**

موضوع: رد: كرسي عاطف الأحد أغسطس 23, 2009 8:46 pm

يا نهار ابيض ... يا ضنايا
وزتين قال طفشو منه
بُص في المنور بتاعكم
والحنايا
تلقى كل الوز قاعد
نفسه نظرة ود منكم
طب عشان ما تقولش قر
واللا باصص لك بشر
بعد شهر الصوم ما يخلص
ليك في ذمة أهلي وجبة وز
يوم من بعد يوم
حتى تكمِّل أكل
شهر
وانت يا صاحبي يا غالي
ليك عليا
إيه وإيه طب إيه
يا مُهْر

أنا رايح انام بقى شربة الحمام كبست على صدر أهلي
ههههههههههههههههههه

موضوع: رد: كرسي عاطف الأحد أغسطس 23, 2009 8:50 pm

أبو القوافي كتب:: عم عاطف
اوعى تحمل هم
واحنا ع المنصة
جبت لك كرسي مخصص
كرسي متدلع بقُصَّة
يتفرد لما يشيلك
ينطوي لو شم غيرك
بس عادل
نفسي لو يديني فرصة
أصله وقَّع كل من عرفه في غرامه
والتقيل ما وقعش لسه

و الله خايف م الكلام دا
يا حبيبى هات لى من دا
يا ابو عبدو شد حيلك
قول لعادل شيل دا من دا
روح و شوف الست ظاظا
كنت ركّبها ف هوندا
و زقها ف البحر يا آبا
اللى شكل الحلوة باندا

موضوع: رد: كرسي عاطف الأحد أغسطس 23, 2009 8:55 pm

يا نهار ابيض
ياني يامَّه
عم عاطف جه كمان
طب راح اعمل إيه معاكم
نفسي انام
فاطر حمام
طب أصرَّخ
لما اصحِّي
كل أصحابي الجيران ؟
والله أدعي ربنا
يقصَّر لسانكم
بس مين كان شار عليا
بالمساجلة الليلة دِيَّا
رب يا عالم بحالي
بادعي في عز الليالي
تبعت النوم عند عادل
لاجل أنام
ليلة هنيه

موضوع: رد: كرسي عاطف الأحد أغسطس 23, 2009 8:56 pm

من عنيه يا خويا عاطف
راح نجيبلك سته نانسى
ويّا كبشه زى روبى
اما هيفا سيبها ليّه
لجل ما تنور دروبى
راح ناخدها . نمشى نخلع
واشتريلها حته طوبى
{ بيبى دول }ملّى فى بالك
لجل ما تمثل قصادى
{ بوس واواتى }
والمؤشر يعلا بيّه
وبذنوبى

موضوع: رد: كرسي عاطف الأحد أغسطس 23, 2009 9:16 pm

أنا سامع إن فيه ف البر وز
و الحكاية باينة و الله و بنت عز
يعنى لينا عزومة كبرى
دا انا جاى من حى شبرا
يعنى تبقى القعدة بلدى
و أنتو أهلى و انتوا سَنَدي
و أوعوا مره تقولوا ضاعوا
جوا شوطه جت خانتهم
و لا حراميه خدتهم
البشر شاهده عليكم
و الوراك باينه ف إيديكم
و الهروب مكروب بيعدى
و الكرم جاى م اللى بعدى
****

موضوع: رد: كرسي عاطف الأحد أغسطس 23, 2009 9:26 pm

جاى طمعان فى المسائل
طب وماله يا حبيبى
حشتلك انا ورك لكن
جعت اصبح من نصيبى
انما يومها راح اعمل
ويا اخويا احلى واجب
راح نجيبلك فول وجبنه
لو دا عاجب

موضوع: رد: كرسي عاطف الأحد أغسطس 23, 2009 9:33 pm

الحكايه دى غريبه
ليها و الله فصول مريبه
الحمام كابس لعبده !
و آدى عادل راح لهيفا
و البشر سامعه و شايفه
أيه بيجرى
اللى يهرب راح لنومه
و اللى هربان من هدومه
راح لهيفا
لجل ما تغسل همومه !
****

موضوع: رد: كرسي عاطف الأحد أغسطس 23, 2009 10:29 pm

رحت أنام هفِّيتوا تاني
ع المزاج
قلت طز في ألف زوج
كان من حمام
أو من دجاج
بس جيت
والصحبة نامت
قلت أقعد
أرعى وحدي
جوز نعاج

موضوع: رد: كرسي عاطف الإثنين أغسطس 24, 2009 9:31 am

المسأله قلبت بوز ؟
هههههههههههههه
صيام بقى
لكنى أنا مستمتع بمساجلاتكم و بجيب الأولاد يقروا معايا و بنضحك جدا
من ظرفكم كلكم
كل رمضان و انتم طيبين

موضوع: رد: كرسي عاطف الإثنين أغسطس 24, 2009 9:38 am

وأنت بألف صحة وسعادة يا سامي

والله مرحب بيك يا سامي
ياللي اسمك
أغلى من كل الأسامي
لو هتضحك
من هنا لحد للقيامة
لو تشاور
تحت أمرك
لحظة.. اجيلك
باليجامة
بس اوعى تقول حرامي
انت غالي
نور منور في العلالي
أو قمر ساكن قبالي
سبت حبك
فوق جبين الشوق علامة
والولاد غاليين علينا
زي روحنا ونور عينينا
ما احنا عيلة
كلنا في الود شيلة
والمكان زي الخميلة
والله مرحب بيك يا سامي

موضوع: رد: كرسي عاطف الإثنين أغسطس 24, 2009 10:09 am

عم طوفا
الحمام راح والسلام
كله من( نَقِّ ) الكرام
عم عادل هات يا قرّ
وانت جاي باصص بشر
المدام وِقْفِتْ بشبشب
قد فردة قلع مركب
قاعدة بتصرخ حرام
خلي عادل ويا عاطف ينفعوك
بكرة هتبات عند أبوك
والفطار هيكون بمش
والفراخ هتكون بغش
والحمام مش راح يخش
واقعد افطر مشوي شعر
كل يوم انشالله عُمْر
والسحور هيكون كلام
واجري للإخوة الهمام
منكو لله يا جماعة
كل خير الصوم إشاعة
اتقلب تجويع وقهر

موضوع: رد: كرسي عاطف الإثنين أغسطس 24, 2009 2:15 pm

مبسوطين

عاملين لى زفه

نفسى حد يعمل مخالفه

للكراسى دى اللى حالفه

لليقعد يوم عليها

من جدوره تكون له قاطفه

موضوع: رد: كرسي عاطف الإثنين أغسطس 24, 2009 3:59 pm

ماانت برضه كنت ناقق
ولأسافينك وداقق
حتى قرّك عندى زاقق
{ والدكر } راح فى المجارى
*******
نفسى فيك افرحلى مره
قلبى يدخلّه المسره
لما بتقول نمت بره
نفس وضعك عندى جارى
*******
فينا واحد بس فالح
عاطف اللى عامللى صالح
واد مطقطق بينا سارح
كل ليله حمام يانارى
*******
حاتحدّ وياك عشانه
حط نقّك ويّا نقّى
نبعتوه عنده ف مكانه
لو ينام مرّه ف سريره
نقّنا يقلق منامه

موضوع: رد: كرسي عاطف الإثنين أغسطس 24, 2009 4:22 pm

يالله بينا نتحد لو يوم عليه
ننتشه عين جامدة جدا
نقلب الميزان وإيه
مش هنرتاح إلا لما
نلتقيه نايم في شارع
يبقى مطرود ماله هِمَّة
واحنا نشمت مرة فيه
أصله قال واد دبلوماسي
كل حاجة ليها حل
طلع الكلُّو في راسي
هادي جدا
مش ممل
واحنا نايمين في الفراندة
وهوه نايم في السرير
عامل الموقع لوكانده
ييجي لما يكون فقير
خدني جنبك
نبقى وحدة
لما يبقى زينا مطرود وهايم
مش هنرتاح منه إلا ان..
شفنا نومه ع السلالم

موضوع: رد: كرسي عاطف الإثنين أغسطس 24, 2009 4:29 pm

فرحانين بكرسى عاطف

اللى وقعنا مقاطف

ولا حد علينا عاطف

لولا سترالله ولاطف

كان زمان الكل لافف

شاش وقطن وحلقه جافف[b]

موضوع: رد: كرسي عاطف الإثنين أغسطس 24, 2009 4:33 pm

احنا ناويين له بنيَّة
بس قولي والله تفلح
راح ننشُّه عين قوية
راح ينام منها مسطح
قرّ قرّ ونقّ نقّ
لما يطلع زينا
يوم من سريره
ع السلالم
برَّه زقّ

موضوع: رد: كرسي عاطف الإثنين أغسطس 24, 2009 4:47 pm

لألأ .. واخدلى بالك انت
يقرا ويطنش ويضحك
واللى متمرمط يا عينى
هوه { عادل } ويّا { انت }
دا ف رقبته حجاب يا بابا
يعنى نقّك ويّا نقّى
راح يرد عليّه .. وانت ..

موضوع: رد: كرسي عاطف الإثنين أغسطس 24, 2009 5:20 pm

طب وبعدين فيه يا دُوْلَة
إحنا نعمل إيه معاه
هوه فاكرها بسهولة
يستخبى في منتداه ؟
لأ ورب الكون ما سايبه
لو ف جحر نكون وراه
طب ندوَّر ..
ألاَّ يمكن
مستخبِّي في ركن قصَّة
واللا يمكن في الخواطر
يالله بينا نبص بصَّة
واللا لابِدْ في الفصيح
مش هسيبه
حتى لو كان مستخبي
في عشه
أو فوق السطوح

موضوع: رد: كرسي عاطف الإثنين أغسطس 24, 2009 5:38 pm

ياجماعه سيبوه ف حاله

أصلو مشغول بالجالو

جه ملحن حلوخالص

عاملو لحن بجد خالص

قمة ف الذوق يا جمالو

من ساعة ما سمعتو فعلا

قد ايه انا مرتحالو

لحن رائع ياجمالو[b]

موضوع: رد: كرسي عاطف الإثنين أغسطس 24, 2009 6:10 pm

رحت دوّرت ولقيته
كان لابدلى فى { المواقف }
قمت جيت جنبه وناديته
قاللى انا .. مش اسمى عاطف
قلت له ازاى ياراجل
رد قاللى مش حنلعب
قلت له صدقنى تتعب
قاللى دوّر عاللى صاحبك
عامله فيّه
والغرابه
اللى انا عامله ف حبايبى
قال بيطلع يوم عليّه

موضوع: رد: كرسي عاطف الإثنين أغسطس 24, 2009 6:37 pm

ردُّوا يا ولاد الحلال
واد جميل مليان دلال
واد ملاطف
اسمه عاطف
العينين خضرا وكحيلة
جاتني نيلة
تاه في سوق النت مني
غصب عني
واللي يلقاه
له هديه
جوز حمام
أو وزة بُنِّي

موضوع: رد: كرسي عاطف الإثنين أغسطس 24, 2009 6:51 pm

لأ وانا نادر مفاجأه
للى راح يقبض عليه
{ وزتى } التانيه ماتت
حاديهاله هديه ليه
******
اما عاطف سيبه ليّه
ليه مكافأه مدّاريّه
حاديهاله لمّا ييجى
{ ريش } محمر فى الصينيه

موضوع: رد: كرسي عاطف الإثنين أغسطس 24, 2009 6:55 pm

رغم انى لسه نوفى

فى منتداكوا

بس نفسى

ف كل لحظه

اكون معاكوا

اقرا

واشبع من كلامكوا

لأ وايه

برضوا بتعلم كمان

من أرأكوا

ربنا يخليكوا ليا

دوله عبده

طوفه عزه

والجميع يسعد

ويفرح

والمنتدى يبقا

فى عزه

عاوزه اقول

حاجه تانيه

ليكوا منى

ألف ورده

موضوع: رد: كرسي عاطف الإثنين أغسطس 24, 2009 7:10 pm

واحدة حلوة وجت معانا
ياه على السعد اللي جانا
اسمها قال إيه هناء
وشها مليان ضياء
يبقى عاطف جاي قوام
أصله بيحب اليمام

والله العظيم منورة يا هناء يالله عاوزين المنتدى كله يشارك معانا

» كرسي عاطف 2
» كرسي الشهادة
» كرسي تيفال !!!
» مصلح أبو حسنين فى كرسي الاعتراف
» كرسي مرسي - طارق منيب