سجدة عاشق

لما بسجد بين جفونك ... أحضن الحلم في عيونك
والمس الشطين بحلمي ... واكتبك حرفين واصونك

لما بلمس ورد خدك ... تعزفي لحني بقدِّك
واما ازور قِبلة شفايفك ... يصحى شوقك قبل ودِّك

واما اصلّي بين كفوفك ... ألقى في جبيني حروفك
ترخي شوقي فوق جوارحك... لاجل انا بس اللي اشوفك

لما اعمَّر بيكي حضني ... يبقى حلم الشوق واخدني
ملمس الورد في شفايفك ... أطلبه ألقاه يزيدني

دوَّقيني طعم ريقك ... واحضنيني بين عروقك
تبقي ستر الليل عليا ... وابقى في فجرك شروقك

طب وليه أحلم بغيرك ... وانتي لفَّاني بنورك
يكفى حضنك واشتياقي ... يكفى ادوق خمرة عبيرك

أعشقك واعشق سماكي ... واسكرك واسكر معاكي
واما قلبك فيا يغرق ... أحضنك وأغرق معاكي

عطشانين والحب ريّ ... والحنين ما بينا ضيّ
افتحي حضنك لقلبي ... أمسك القلب بإيديّ

لذة العاشق ؛ دموعه ... متعة الهايم خضوعه
واما يصرخ " آه بحبك " ... تسمع الأنات ضلوعه

نشوتي , رعشة حنيني ... والضيا زاين جبيني
نفسي أصلِّي فوق خدودك ... بالشفايف .. تبقي دِيْنِي