الحلم كراسه حساب

[b]الحلم كراسه حساب[/b]
في نسمه هاديه
من بعيد
جايه تونس وحدتي
والليل مدور غنوه مجمعا
كل اللي عايزين
يسهروا
كنا تلاته
انتى و
أنا و
حلم رافض يكتمل
كنتى هنا
ومانتيش هنا
كنتى فكره
ف الخيال
صوره لإلهة
جمال
تدى دروس العشق
زى ما قال الكتاب
مسمار عذاب
واندق جوه القلب
دقه ودقتين
الدقة هي دقته
لما بينخر
ف الوريد
والدقتين
كانوا كلمتين
بس اتنسوا وسط الألم
سرسوب عدم
حالف يغرق كل حته
ف مركبي
وأنا البحار البحر
هو دنيتي
أنا كنت ناوي أوصل
لشط المستحيل
بس الحقيقة لما ضيعتي
ضل ف عنيا الطريق
البحر كان عايز
يجمع شملنا
ليه أتقلب؟
خلى المراكب
تتجه ناحية سراب
دفتر حساب
جواه معادله
حبنا
( لو إن حبي يساوى
سين
وسين تساوى
كل مره الشمس هلت
ع البشر
ونضيف كمان
عدد اللي شافوا
نور بينزل م
القمر
من عهد ادم
حتى أخر دقه
ف قلوب العباد )
احسبيها
وان وصلتي للنتيجة
حصلينى
أنا أصلى
واخد مركبي
و رايح لقلبك
هاشتكيله
منه ليه
ما أنا أصلى
معرفليش كبير
فات الكتير
و آن أواني
انى ارجع
م الخيال
النسمة وقفت ف
الفضا رافضه النزول
على قلب لما بينجرح
ينزف سؤال
واكتشفت
انى عارف انك
انتى مش معايا
بس قلبي لسه
عقده ف شنطتك
بستعطفك
مدى ايدك
جوه صدري
امسكيه
لفي فرده من
ضفايرك جوه منى
واشنقيه
وأدى السؤال
تفتكري لما نفسخ
عقدنا
ممكن أبداء
من جديد؟
اعترض ... اهو هو ده
يبقى المحال