موت الحلم

أنا بسيط مش عبيط
أنا تعليمي غيط
أزرع كل شيء
من القمح للقرنبيط
****
دكتور كبير في مجالي
عايش وراضي بحالي
ولا عمري حلمت مره
بغير أرضي وبيتي وعيالي
****
وابني زبال أصيل
في شغله ما لوش مثيل
كل سكان منطقته
بيقولوا شغله جميل
****
وبرضوا دكتور في مجاله
وعايش وراضي بحاله
وعشان العلم نور
بحلم بنور لعياله
****
وزاد في عيونه العلم
لحظة ما شاف الحلم
في ميدان التحرير بتحقق
وأصبح حقيقة وعلم
****
على ايد شباب متعلم
ع الفيس والشات بتكلم
قال يرحل هو ونظامه
وأنا بأمر مش بتظلم
****
وفجأة شاف أهل العلم
خلوا الثورة مجرد فيلم
لقطه فيها شهيد بيموت
ولقطه تأكد موت الحلم
****
سقط العلم في نظره وقال
التعليم بقى لعب عيال
غايب منه أي تخصص
حاشر راسه في كل مجال
****
زرعوا ثورة هدفها آمان
واستقرار وحكومة جدعان
طرحت لينا يا حسره علينا
زرعه خبيثة اسمها إخوان

وليد الوصيف