بريء وراء القضبان

وبحلفلك على القرآن
انا التايه
انا فيكى بدون عنوان
وانا المسجون بدون تهمه
وميت سجّان
وبنعانى عشان عاشقك
وعشقك مش مطمّنى
مع إنى .. انا ناسك
وانا ف العتمه ونّاسك
وانا الناسك فى محرابك
بقيت مفتون
وانا العاقل ومش مخبول
وان اللى ف عرفك العايش
لكن .. مقتول
وانا اللى ف برجك العالى
كما الرايه
لكن تحت التراب مدفون
مع إنى
فى عشقك انتى يا ليلى
انا المجنون
وانا المركون على رفّك
وانا المدعو اكون صفّك
فى عز الشدّه تلقينى
برنجى ف وقت اتراحك
يا هاملانى فى افراحك
وناسيه إن من دمى
نصبت العُرس عالضفه
وانا المعازيم وانا الزفه
وانا المركب وانا الدفه
وانا المزمار وانا الكوشه
وانا السكه اللى مفروشه
بعزة ذلّنا ليكى
وندعى ربنا يصونك .. يخلّيكى
وليلة فرحتى بيكى .. تبكينى
وليه رافضه ؟
تعدّينى على فرحك . وناسيانى
ياقاسيه ياللى مدّانى
مابين شطّين
عشان غيرى يعدّيلك
وخيرك اللى ما جالى . وما ادّانى
يا مدّانى بكرباجك
وضهرك ليّه لما اطلب واحتاجك
وبرضه انسى والقانى
اقوم آخدك فى احضانى
يا صالبـــــــانى
مابين قاعك وبين صرحك
وبنصارحك
تقومى جايه جالدانى
وعاصرانى .. ونازفانى .. وحابسانى
مابين جدرانك السوده
عشان صوتى علا ف مره
وقلت اطلب فى يوم حقى
وانا ف شقّى
باشوف مكتوب على الجدران
بلون احمر .. تعيش .. تحيا
ولون أبيض .. فداها الروح
ولون تانى مانيش عارفه
تاريخ الموت
ومش لاقى مكان اكتب عليه إسمى
ولا حتّه على الجدران
عشان اكتب .. بحبك موت
ولاسنتى عشان غيرى
يسجل لى تاريخ موتى
فضلت اصرخ
لحد ما انقطع صوتى
واقاوم رعشتى وخوفى
واغطى راسى بكفوفى
وادور بعنيه ف اركانى
واشوف فى ركن زنزانتى
آثار الموت
وصوت بيقوللى ده معاده
وزير ينزف فى دمعاته
كدق الثانيه فى ودانى
على أرضية الاوضه
وماشيه دموعه فى مجرى لحد الباب
على حروفها طابور من نملك العايش
أكيد النمل ده زيّى
عشق إسمك وحابسينه
وتتعلّق خيوط شوفى
بخيط م الضى يتسرسب بعقب الباب
واحبى لحد ما اوصلّه
والزق خدى بترابك
وشوفى يعدى من بابك
والمح جذع عنبايه بيشرب ميّة المجرى
وساقط طرحها الحصرم
أمد ايديّه واستطعم
حلاوة طرحك العلقم .. واقول الله
والفين آه
عشان حسّيت بصوت أقدام
بتتقرّب على بابى .. اخاف واحبى
واوصل ركن زنزانتى
وادفن دقنى ف ركابى
ماهو اليوم ده .. حنسمع حكمهم فيّه
ونعرف ذنب ناسبينه اكيد ليّه
وكان الذنب كالآتى :
عشان إسمك هنا { عادل }
فده ذنبك رقم واحد . واسمك شاذ
ولا نعرفشى شيء عنه
واما ذنبك التانى
فصيلتك ياابنى { ميم .. صاد .. راء }
ودى كارثه ودمك انت عاملها
وحللناه ف معاملها
وحبسك طال عشان انت
رفضت تميل مع ميلها
وانا اللى كنت بحروفى بجمّلها
ولا عمريش بهمى كنت احمّلها
ورغم انها قاسيه
شــــــــــرف ليّه
اموت منها .. اموت ليها
فى يوم اسمى حيتخلّد
ما دام جسمى اندفن فيها ...

الاستاذ محمود
اقرا النص جيداّ . فالجحود هنا ليس للام كما تصورت
ولكن لمن يحاكموننا على إنتمائنا وحبنا لهذا الوطن .
واياك يا استاذ محمود ان تشكك فى وطنيتى او حبى لهذه
الارض . واقرا نهاية النص عندما اقول :
شرف ليه
اموت منها .. اموت فيها
فى يوم اسمى حيتخلّد
ما دام جسمى اندفن فيها
عيد قراءة النص بتأنى ربما تصل لما اريد ان اقوله

وان كان اعنوان استفزك يمكن تغييره

الغالى ابن الغالى
مازن الجندى
اشكرك يا حبيب قلبى على مرورك العطر ووجودك بصفحتى .
وربنا يخليك ويديم تواجدك الرائع .
وتقبل كل الود يا مازن ...

ربنا يخليكى ليه ياعزه اخت وحبيبه .
اشكرك على تواجدك المنير وتعليقك المشرف
وارجو الا تحرمينا من تواجدك .
{ الندوه كانت وحشه من غيرك }
شكراّ لمرورك الجميل يا جميل
وتقبلى كل الود والتقدير ...

الحبيب الغالى
ضياء الدين
يا عم خدنا احنا تلاميذ عندك .
دا انت انسان رائع وشاعر جميل .
وما تحرمنيش من وجودك وتعليقك الجميل .
اشكرك يا ضيا وتقبل ودى وتقديرى ...

الشاعر الجميله
همس العيون
تفتكرى بعد التعليق الرائع ده ممكن اقول شيء غير
متشكرررررررررررررر جداااااااااااااااااااااااااااا
ويسلم وجودك الذى اسعدنى بالفعل .
مشكوره يا همس وادام الله وجودك الرائع .
وتقبلى ودى واعزازى ...

الله .. الله .. الله .. الله .. الله
الله عليك يا استاذنا وعلى شعرك الرائع الذى اتضاءل امامه .
والله وبدون مجامله ياريت ما تفرطش فى هذه الازجال الجميله
وحاول الاحتفاظ بها لأنها مرحله اظهرت لك حبك الباطن للعاميه
وجعلتك من فوارسها ..

وبحلفلك على القرآن
انا جنبك
انا التايه
ماليش عنوان
يانور ساطع على الصفحه
يا فارس جوه الف ميدان
وبتبارز بعاميه
فشر بيرم
وفى الفصحى فشرها نزار
لكن خايف عليك فعلاّ
ضحايا كتير بيدعولك
تخش النار

الاستاذه الشاعره الشقيقه
وداد الهوارى
والله وفعلاّ بنشوفها
ست الستات
واجمل جميلات
وف سجنى بنكتب اشعارى
واجمل ابيات
وأغمّس عيشى بملحايه
واتخيّل حصوها قمحايه
واشرب ميّتها واحلفلك
طعمها شربات

استاذنا الجميل
محمد سالم
يكفينى مرورك المضيء على صفحتى فتنير حروفى
وتزيدنى شرف وبهاء .
اشكرك يا حبيب قلبى على هذا التواجد العطر .
مع خالص ودى وتقديرى ...

الغالى الحبيب
عبد الله علام
انا اللى بشكرك على التواجد الدائم على صفحتى المتواضعه .
وسعيد جداّ لما بشوف صورتك الجميله منوره التعليق .
اشكرك ايها الرائع وتقبل منى كل الود والتقدير ...

الاستاذه الجليله
رنا البحراوى
والله العظيم انتى اللى رائعه .
وباتشرف بوجودك النادر وتعليقك الجميل .
وعلى فكره .. تواجدك على صفحة العاميه تواجد مهم
ومرغوب فيه بالنسبة للاخوه ومرورك المضيء يتمنونه
جميع اعضاء هذا المنتدى .
لكى منى كل التقدير على هذه الزياره الخاطفه ...

الاستاذه الكبيره
ريمه الخانى
كل الشكر والتقدير لشخصك الكريم المتذوّق للكلمه
شرفنى مرورك المشرّف واضاء صفحتى بنور محياك
وعطّر قصيدتى بعبق الطُهر .
شكراّ ايتها الرائعه على مرورك وكلماتك الزاهره ...