سبارتاكوس .. حلم العبيد

الحلم جُوَّه المُعْتَقَل
بقى مستحيل
والحياه ضد الشريعه المحدثه
والموت بقى صعب المنال
والروح بقت مابين وبين
وملكش حق الإختيار
مكتوب لنا نقبل حياه
ضد الطبيعه المُطْلَقه
الليل بيطغى عالنهار
الزرع ضد الإخضرار
والجبن طاب فوق الشجر
والطَرْح ضاق بيه البَرَاح
والرعب أصبح فينا داء
وكل واحد مننا
قشّر وداق
والمر نازل حلقنا
شفره بتقطع حبلنا
والحنجره تحبل سكات
تولد خرس
يطمع حرس كل الشجر
يطلب يِزَغْزَغ بطننا
برد البلاط
يبدأ يداعب ضهرنا
نقش السياط
نرقص على عزف الوجع
نجرى على جذع الشجر
نرويه عياط
نقطف وناكل يتَّسع
الجرح اللى بيتلسع
م الهدمه لما بتلمسه
ينزف ما نقدر نحبسه
ينزل يبقع فرشنا
يفضح خرسنا وضعفنا
ويذلنا قهر الرجال
القهر اللى بيتولد
من بعد مامات واندفن
من عصر آخر إحتلال
راجع يبات
جوه الزنازن والديار
وبظلمهم
يطفوا الشموس
ندخل ندوس
ونزق ابواب الضلام
متسلسلين
رجلين .. كفوف
نقفوا صفوف
علشان نصلى ركعتين
من قبل ما ندخل ننام
يقرا الامام :
بعد التشهد والسلام
حسيت بإن اللى إتقرا
شيئ مش تمام
سألت راجل كُبّره
شفت الكلام اللى اتقرا
من شيخنا بعد البسمله
{ إن الذين مثلكم
لابد ان يطّهّروا
أن يجلدوا . أن يُقهروا
لجل الكبار تعرف تنام
والرب يغضب لو غزا
عقل البشر حلو المنام }
مع إن قرآننا الكريم
مانزلش فيه هذا الكلام !!
قام قاللى أسكت والنبى
وادخل ونام
من ربع قرن بنسمعه
وبيدّعوا إن الولى
مبعوث من الرب العلى
علشان يطهّر قلبنا
م الحلم اللى بنحلمه
وبيقلقه .
مع إن لما بنختلى
مع نفسنا
بنلاقى إيدنا بتترفع
ومافيش إجابه للدعا
وازاى ح يقبل ربنا
منا الدعا وحيستجيب
واحنا العصاه
واحنا اللى نستاهل كده
علشان سمحنا للولى
يرفع عصاه
يا حبّذا .
لو دعوه تفلت م الحرس
توصل بحالها لربنا
يوهب لنا
قوه على سن الكلام
يبقى بمثابة مقصله
تفصل رقاب اللى ضغط
واللى اختصر
الظلم كله ف جلدنا
نلحم حبال الحنجره
نشنق بها
كل اللى رخّص سعرنا
فى سوق العبيد
كل اللى صابب دمنا
زى النبيد
بس الاكيد
جى النهار
راجعه الشموس
رغمننا أضعف نفوس
لكن لابد حيتولد
من بينا تانى
{ سبارتاكوس } ...


ت