حرب!!!!- طارق منيب

مش حنطًفي النور ولاحاجة

ولا راح نبني ساتر طوب

جوجل ارث ماخلاش حاجة

ماهو صورنا بدن وقلوب


أيه حنخبي .. فارق تقني

ولا العالم واقف ضدي

لكن ربي .. أكبر مني

راح يعدل وضعي المقلوب


راح ينصرني لأنى نصرته

وبيخذلني لما باغالطه

واقول أني باقدم طاعته

وأنا مش عايز حتى أتوب


أيوه الحرب صحيح أهي قامت

والصهيوني بيغرق ألحق

رُكب الدنيا كمان أهي سابت

خايفة حسين يقتل مسبوب


لأ مش باحلم ولا باتمنى

ولا عالزحف كمان حاستنى

حالحق ألبس ثوب الجنة

واحرر قدسنا بالطوب


كل عيالي راح تلحقني

أما مراتي راح تسبقني

ويا جيران الحتة ف حارتي

زي جهاد ويا المحبوب


محمود طبعاً ماسك سيفه

ألطاي عارف أسباب خوفه

أما سلامه حايرجع شوفه

عنتر حامي سيف شيبوب


عبلة كمان نسيت روايتها

أصل الحرب دي كات حكايتها

طبعاً قالت طز فـ عنتر

ربك والله رب قلوب


أما صلاح الدين أهو واقف

عمره ماقالها ف يوم أنا خايف

لما جريت قالي صحيح هايف

ده حقيقي كان يوم مطلوب


وسألت العالم بتحدي

فيها أيه لما أحرر أرضي

وكمان بحري ومعاه نهري

نهر النيل مش نهر دانوب


فجأة لقيت مليون طيارة

قايمة علينا تدك الحارة

أذن بينا شيخ الحارة

قلنا النصر اكيد مكتوب


يالا نصلي صلاة الفجر

قبل ماتيجي صلاة الظهر

ييجي النصر.. نصلي العصر

نلقى عزولنا صبح مرعوب


كان فيه ناس بتشوف الماتش

قامت جري معاها الكوتش

سابوا الملعب ويا الدش

قالوا مش وقته ده وقت حروب


فجأة صحيت مـ النوم على رقصة

والرقاصة بتحكي القصة

ازاي كافحت وازاي ناضلت

واخدة حياتها بالشقلوب


أما الأهلي ففاز على أنبي

طب بالذمة أنا أيه ذنبي ؟؟

أنسى قضية كات يوم جنبي

كانت حلم فـ يوم مرغوب


قلت الحلم جميل والله

أيه خلاني أحلمه بالله ‏

ردوا عيالي ويا مراتي

حوش الغطا أحسن مقلوب

‏.....................................‏