أيه اللي جابك " مهداه إلى يوم مولدي " - طارق منيب

إيه اللي جابك
هو فرض وكان عليا
أني اشوفك كل عام
وبجنابك
جاي تقرب من عينيا
تيجي وتجيبلي الكلام
والقى كل الناس تهني
وانت طيب .. وانت طيب
طب وليه؟
ده الأمل كان يوم قريب
جاي بعد اليأس ليه؟
سيبني وامشي
خليني أهرب وأمشي
عمر يوم ماكنت يومي
ده أنت يوم بابكي عليه
.............................
كنت طيب
عايز أعيش العمر طيب
عايز أشوف الكل طيب
أصلي طيب
ألقى كل الدنيا شر
القى حزن الدنيا نهر
بس برضه فضلت طيب
وانت طيب .. وانت طيب
طب وليه؟
دي الكلاب ماشية تعض
أبقى طيب تاني ليه؟
قول ورد
يالا سيبني بكل ود
عمر يوم ماكنت يومي
ده أنت يوم بابكي عليه
.............................
عشت عمري
الأماني كات عريضة
والمعاني كات عبيطة
ناس بتكسب
والحياة ملعب ومكسب
واللي زيي لو حيلعب
الكروت دايماً قليلة
أعمل أيه مابيدي حيلة
طب وليه؟
النفاق والكدب سادوا
والشرف مش ده ميعاده
لازم أخسر
يالا امشي سبني أفكر
عمر يوم ماكنت يومي
ده أنت يوم بابكي عليه
.............................

اطال الله عمرك واحسن عملك ورزقك التزود مما يرضيه عنك ... اسلوبك اصبح له نكهة خاصة ... نكهة تحمل خبرة الايام و وجع التجارب...

دمت بكل ود

بارك الله فيك ياأستاذ/ أحمد وواضح أنك كثفت نشاطك من دلوقت

وإن شاء الله مع بداية تنفيذ الخطة حنكون كلنا معاك

» بيرم منيب يعارض بيرم سند "مهداه للرئيس مرسي - طارق منيب
» ياريتك فار- مهداه للثورة المضادة - طارق منيب
» مش حينفع "مهداه لأول رئيس منتخب"- طارق منيب
» قبل ماتضيع الهوية- تأليف طارق منيب - مهداه للمدعو محمود سعد
» ولأني مصري مهداه إلى الشجاع أورنسيوس المقدسي- طارق منيب