هارب من الزمان - طارق منيب

قررت أهرب وأعيش قصة غريبة شوية .. أوعى تقول إن أنا مجنون
أصل الأصعب إني أعيش زمني وليالية .. عتمة وضلمة كمان وشجون
قلت راح أهرب مـ الأيام .. لأ مش باحلم ولا أحلام
لازم فعلاً أكون شمشون

قلت راح ألغي المية السخنة من السخان .. وارجع تاني أعيش بباجور
جيت أشتري منه مالقيتش وقالوا ده جنان.. داري جنانك عيش مستور
فين الفونيا فين الكباس.. طب أشتري من فين الجاز
قلت راح أنسى لكون مجنون

رحت أسأل على تليفزيون زي المجنون.. أبيض واسود صوته لطيف
قلت خلاص إل إي دي إوعى تخبيه..... بس يذيع الماتش لطيف
فين برنامج نور على نور.. فين ماما سلوى وفين فرفور
لأ مش حانسى دي أحلى فنون

وفي يوم حر الناس هربانة جوة البيت .. عز الموسم والتصييف
بليت فوطة بمية وتلج وقلت ياريت.. ننسى شوية صوت التكييف
ننزل نمشي عـ الكورنيش.. نجري بسرعة أو بشويش
نلعب كورة واجيب الجون

جبت الطشت وكمان زهرة وقرش بوتاس.. طبعاً طبعاً كله خيال
قلت لحرمي كمان تغسلي زي الناس.. قالت الرحمة يابن الناس
طب ليه مش عايز الغسالة.. قلت لحرمي دي عيشة زبالة
كل شوية زرار ده جنون


جبت النشرة حبيت أسمع في الاخبار عن خبرٍ هام.. عن تعيين دفعة سبعين
بس أوائل الدفعة راح حيكونوا في منصب هام .. مش بالواسطة من العاملين
واللي يفكر يوم في الرشوة ... راح نديله ساعتها الطرشة
أو راح يصبح يوم مسجون

فوقت في لحظة ولقيت نفسي باعيش في الواقع.. بس الواقع صوته مرير
لما لقيت نفسي وفي لحظة مقلوب واقع.. أما الغطا فاهو تحت سرير
عمر مانرجع زي زمان .. أصل الماضي في خبر كان
والمستقبل داكن اللون