أعظم جنينة

أعظم جنينة

1
أصلى على طه وصىّ
بالأم بر وكرامة
إكرمها تلقاها فرصة
بها تنجى يوم القيامة
2
لو ترضى عن ابن يرضى
عنه الإله الرحيم
لا يلقى فى السكّة عارضة
و لا تهوى رجله فى جحيم
3
الأم أعظم جنينة
وهبها ربى لعباده
تسامحنا مهما جنينا
والبصة فيها عبادة
4
الجنة أسفل قدمها
ورضاها شمسك وبدرك
وليك جديدها وقديمها
ولا مرة قسّاها غدرك
5
مافيش غير أمك يحبّك
وفى كل حالك يعينك
فى الشدة بيوّلى صاحبك
وان خير أتى لك يعينك
6
حسّن كلامك مع امك
ان كنت حاضر وغايب
تلاقيها دايما فى يمّك
وان كنت مخطىء وعايب

7

سبحانه وصانى أبرك
يا أمى ربى فى كتابه
يحمينى من الغرقة برك
ورضاك يمحى عتابه
8
سقانى صدرك محنّة
وادانى عافية ونمانى
وفى عز ضعفى ما حنى
الا كفوفك يمانى
9
الدعوة منك بتمحى
م السكة عتمة وحواجز
وتزيد شعيرى وقمحى
وتشدّ حيل العواجز
10
سامحينى لو ضلّ ريحى
أو خسّ فى التقوى حيلى
أشقى انا وانت استريحى
وان جيت سليم افرحى لى
11
ما قادرشى يا أمى كفّى
يحيط بفضلك علىّ
لا حيلى ولا عمرى يكفى
دانت الجنان العليّة
------------

اخى الشاعر عبد الرحمن
مربعات جميله وانت كتبتها بوعى وبراعه
احييك عليها .
مودتى وتحيتى ...