أصل التاريخ .....

أصل التاريخ
********

افتحوا كتب التاريخ
مصر دي أصل التاريخ
مصر أحمس ... مصر مينا
مصر م النوبة .... لسينا
ياللي قلت ف مصر ساكن
مصر هي ساكنة فينا

* * * * * * * *
مصر أبو الهول و الهرم
مصر دي النيل و الكرم
مصر للعالم منارة
مصر دي أصل الحضارة

* * * * * * * *
مصر هي الفيمتوثانية
من زويل ... لمشرفة
مصر يعني سميرة موسي
مصر علم ..... و معرفة

* * * * * * * *
مصر قبط ... و مسلمين
مصر مهد لكل دين
مصر دي البلد الأمين
مصر الأزهر و الحسين

* * * * * * * *
مصر رمز ...و مصر معني
الجرس ... و الألف مدنة
مصر من أجداد جدودنا
مصر دي لولاد ولادنا

* * * * * * * *
مصر معشوقة جاهين
لما بالأحضان ياخدها
مصر ثومة ....
بالسلام بتمد ايدها

* * * * * * * *
مصر هي العندليب
لما عداها النهار
مصر قصر الشوق نجيب
السكرية ..... و ميرامار
مصر جند الله في أرضه
اللي جابوا الانتصار

* * * * * * * *

مصر أكتوبر .. و الشهيد
ف السويس ... و ف بورسعيد
مصر 100 مليون فدائي
ف كل بحري.... و ف للصعيد

************
مصر يامه يا بهية
في عيون الشيخ امام
و عم نجم بكلمتين
يا مصر... قال أحلي كلام

* * * * * * * *
مصر دي حلاوة زمان
العروسة ... و الحصان
الموالد .... و الموائد
صوت لرفعت ف الادان

* * * * * * * *
مصر الوليد .... و السبوع
و أمه نادرة تقيد شموع
مصر البخور و المسك عود
و الرقوة من عين الحسود

* * * * * * * *
مصر دي الليلة الكبيرة
مصر سنيورة و أميرة
الملاية .... و العباية
و بنت بفيونكة ف ضفيرة

* * * * * * * *
مصر يا حلم الغلابة
و سيرة أبوزيد الهلالي
الضوي ... متقال ... ع الربابة
احكي يا أبو حسين الليالي

* * * * * * * *
مصر الجيران ....
ف الفرح و الشدة
و لمة العيلة م النونو للجدة
ده طبع فينا مهما الزمان عدي
مصري و رضع نيلك ...
و ف خيرك اتوضا

* * * * * * * *
مصر اللي عانت م الفساد
زاحت الستاير
مصر اللي اخر صبرها
بانت البشاير
مصر اللي ندهت ع الولاد
لبوا الندا بثورة يناير

أشرف البنا

[/size][/color][/center][/b][/center][/font]

الاستاذ الشاعر
اشرف البنا
تسلم ايدك .. فانت كتبت مصر بحروف من حب
وياليتهم يقرأون .
مودتى وتحيتى ...

شكرا مروركم و كلماتكم الرقيقة أستاذنا الفاضل عادل سند

» رغم انف التاريخ
» نوح التاريخ
» قال التاريخ
» قال التاريخ
» التاريخ