حكــايتنا (من وحى فن الواو)

** حكـــايتنـــا **
---------------

تعالوا بينا نشوف
حكايتنا إيه فى الأصل

خلو الورق مكشوف
ندرسها فصل بفصل


حكايتنا كانت شعب
متدارى فى الحيطه

عاش الحياه بالصعب
بيزق براويطه


كان حلمو أكل وشرب
أو سكنه مأمونه

داق المرار والكرب
من صفوه ملعونه

وفجأه هبت ريح
وكان علينا الدور

ثورة بشكل صريح
راح تكشف المستور




الدم سال عالأرض
خلا التراب أحمر

قولنا الشهاده فرض
وكبيرنا مستحمر

فاق الغشيم لكن
بعد الخراب والموت

بعد اللى كان ساكن
ما بقالو حِس وصوت

وقولنا عدينا
مـ الظلم والجبروت

حياتنا بإدينا
ومعدش فيها سكوت

يا اخوانا يا شطار
يلا بقالكم دور

وِحَيَ عالإعمار
نبنى فـ طريق النور

نخلى راية الدين
فى العالى مرفوعه

وكلمة الظالمين
متكونش مسموعه


وفتحنا ليكو الباب
فى الشعب والشوره

أصل الزمن قلاب
بيبدل الصوره

ورياسه وحكومه
فـ إدين معاليكو

والقبضة محكومه
ما تيَلَا  بقا بيكو


النهضه دى شعاركو
حريه ويا العدل

تُهنا بأفكاركو
شوفنا الخسيس والندل


ورجعنا من تانى
نندب مرار حالنا

وصوتنا حَيَانى
الرحمه يا اخوَنَا


هيرو البطل جانا
يحمينا مـ الأشرار

وكلامو خلانا
زودنا الاستحمار


هيرو البطل طالب
الشعب بالتوكيل

أمر البطل غالب
بالعافيه يبقى وكيل

والدم سال تانى
ولا حد عارف مين

عسكر من اخوانى
ما الكل بنى ادمين

الكُرْه زاد بينَا
وبقينا منقسمين

علمانى أو سنه
والكل شال الطين

حكايتنا مشهوره
والكل غناها

بالصوت مع الصوره
شوفنا وسمعناها

لسه مخلصتشي
وجَيْ فيها كتييييير

إرفض ومتخافشي
والرب لُهْ تدبير