الشيخ عليوة

الشيخ عليوة
........................
كل البشر بيكدبوا
الا النبى صادق أمين
وهو مين زي النبى؟
قولولى مين؟
الشيخ عليوة
ولوه علينا
فجأة أمير المؤمنين
جايب رساله من السما
باسم دين
بيكفر ال بيرفضوا
حكم الجماعه المنزلين
أعلن خلاص عن دمنا
انه مباح
وقال كمان اننا
بعيد أوى عن الصلاح
الشيخ عليوة
انسان غبي
اه والنبى
قولوله انا مسلمين

وموحدين
ولكل فرض مؤديين
وعرفوه ان اسمنا
احمد وحامد وابراهيم
ومؤمنين بان الله قدير
وان الاله واحد أحد
ومالوش بديل
وفهموه
ان احنا بنحب البلد
وعشانها بس مضحيين
بكل شئ من غير تمن
انسان غبي
الفهم عنده ماتلاقيش
سيدنا النبى اخر رساله
وبعد النبى تانى مافيش
كل البشر بيكدبوا
الا النبى صادق امين
ومصر دى لعلمكم
محفوظه باسم اله كريم
هنعيش ايدين متشبكه
مسلم مسيحى متجمعين
عشان بنحب البلد
والبلد فوق الجبين
البلد هتعيش ولو حياتنا التمن
ومش هنسيبك يابلد
لأي حد مهما كان
مهما كان التمن

وقولوله انا مصريين
بنحب بعض
وحبنا هيعيش للابد
وللأبد متجمعين

...............................................
شاعر الاحساس

عبدالتواب الرفاعى

ما اجمل معاني كلماتك اخي الشاعر

فعلا في ناس فاكرة نفسها اوصياء علي الدين والدين براء منهم ومن افعالهم

وقانا الله شرهم وشر الفتن

يارب احمي مصر

تقبل مروري وتحياتي

عزيزتى سلوى عبدالعزيز
واخى محمود بسيونى ربنا مع مصرحتة مركبة
........................................

الشوق رمانى ف حضن نيل
اسود ضلام
الشط ساكت
والناس نيام
والميه هاديه غير كل مره
والقمر مالهوش وجود
شوقى اليكى ...عدى بصراحه
كل الحدود
خلانى أسبح ف حضن نيلى
وغرقت جامد ف الضلام
لاقيت شعاع نور بسيط
من مركبه....ماعرفتش اهرب
من الحقيقه للخيال واعمل عبيط
وصوت عيال عماله تلعب
فى مركبه من غير شراع
الأب حاضن للشبك
والمركبة عشي جميل
فى نهر نيل
رغم الضلام
وعيل صغير عمال بيبكى
من برد لاسع جتته
الليله برد والمطر غرق شراع المركبه
رغم السيول حضن الدفا
موجود فى حتة مركبة
والفرحة عمت ع الوشوش
لما الشبك صاد السمك
والزيت بيقدح فى طاسه سودة
كات ليله مرة ع الجميع
الا صحاب المركبه
كانوا فرحانين
والصحبة كانت طيبة
ونسيت بجد انا رحت ليه
للنيل هناك
كان نفسى أرجع ذكرياتى
ويا حبيبتى الطيبه
على شط اعظم نيل
مخلوق لمصرالطيبه
كات ايدى ماسكها كفها
فاكر انا
دخت لما لمستها
كانت عنيهاأحلى من الخضار
وخد ميزته الاحمرار
وايد غريبه بترتعش
رغم الامان
رغم شوقى الي حاميها
كان القميص هو الدفا
دفيتها بيه
لبستها توبى بعرقى.
..................... استحلته
اليله دى تشبه لليله عشتها ويا النجوم
مع حب عمرى وذكرياتى
وقلبى دق من فرحته
كان قلبى عامل زي قلب المركبه
واقف متين
واقف شجاع
مين ال باع
حلم الغلابه ع الرصيف
مين ال خلى حلمنا هو الرغيف
مين ال سارق قمحنا وعامل شريف
هو انتو ايه
ايه جنسكوا
هو احنا مش بنخصكوا
ولا مطالب السياده منكوا
نسيب البلد
نسيبها ليكوا ده حلمكوا
وعشان نسافر مشكله
هنجيب منين تمن السفر
المركبه ممكن تشيلنا كلنا
ولا هتغرق
ومين يصدق
رغم ضلام الليله والسواد
لسه الشعاع
جايب أمل
ريحة عبير
ونور شديد
جي من بعيد
جايب معاه
مليون مغنى للفرح
الحفلة أكبر من أى شئ تتوقعه
الحفلة ثورة
بس ثورة المرة دى مترتبه
ليها صحاب
وليها قائد
المرة دى مش العيال
ال فى يوم هيفركشوهم
وهيقدروا بالكدب يوم هيبعدوهم
المرة دى كل الوطن
المشكله مش فيكى انتى
ولا فى السمك
ولا فى اتساع خرم الشبك
المشكله غ الي شبك
مليون حرامى فى حلمنا
فاستحملى واتحملى
الصبر مفتاح الفرج الصبر مفتاح الفرج
.................................
شاعر الاحساس
عبدالتواب الرفاعى

أنا نفسى ترجع مصر
..........................
سلامى لسيدنا وابن الكرام
ولاخته الكريمه مليون سلام
سلامى لصحبه فى يوم القيامه
فى جنه عظيمه تحية سلام
سلامى اليهم بشوقى ومحبه
حبايب قلوبناوأغلى الأحبه
سيدنا الحسين وستى أم هاشم
وقلعة صلاح وترب الغفير
والازهرحبيبى شراع الأحبه
سلامى لمبنى بناه الجدود
لجندى يموت هناك ع الحدود
لسد أصيل غير كل السدود
بيحمى البلاد ويرعى الوجود
سلامى للمه ف اخر شارعنا
ونفرش حصيره وجبنه قريش
وناكل ونشبع ونضحك نعيش
سلامى لأمى وبوسولى ايدها
وابويا واحشنى وغيره ماليش
والي ساكنه وشاغله كيانى
مراتى حبيبتى الي قالبه حالى
سلامى اليها ونفسى اشوفها
واحلف لاعمرى فارقنى طيفها
ولابنى وبنتى وكل الصحاب.................
سلامى لمصر ........سلامى اليها لكل الشوارع
لكل الحوارى وكل المدن
لكل القطرا وكل السفن
لمصر الحضاره الي مش فاكرها
وطيبة طباعها الي فى واحده غيرها
لمصرالاصيله بنت الاصول
لمصر ال سافرت
لمصر ال تاهت
لمصرال لسه ساكنه فى كل الخيال
وقولولها رساله من ابنك اصيل
تايه ودايخ بقاله سنين
مش لاقى سكه يعود للمدينه
ولا لاقى شط وبرومينا
ونفسه الايادى تتشبك فى لحظه
ونركب سوافى نفس السفينه
وقولولها نفسى اعود تانى ليها
ورسالتى اليها
.......نفسى ترجع مصر
............وتتشبك كل الايادى يارب..........................
شاعر الاحساس
عبدالتواب الرفاعى