مأساة الحطاب

مأساة الحطاب!

حطاب باقطع خشب .. والبلطة راس مالى
فى السوق بابيع الحطب .. واجيب غدا عيالى
باطلع يوماتى الجبل .. وانا كلى طاقة وامل
انى اعود محتمل .. ومعايا شئ غالى
====
ساعة ما احس التعب .. ارتاح على توتة
واعزف على ناى خشب .. نغمة صغنطوطة
بترد فيا الروح .. عقلى معاها يروح
انا قلب كان مجروح .. فى حكاية ملتوتة
====
وف مرة اخر النهار .. والناى بيحكينى
حية مابين لشجار .. لقيتها بتجينى
زاحفة على بطنها .. وحاجة فى بقها
سحرتنى من ضيها .. ونسيت شقى سنينى
====
قالتلى خد يا جدع .. دى جوهرة هدية
بس اوع يوم م الطمع .. تنسى ان انا حية
عدى عليا هنا .. فى معاد يتيم فى السنة
واعزف هاجيلك انا .. بواحدة غير ديَه
====
قلبى يا بير مليان .. بهموم كتير وشجون
افرح وغنى كمان .. سمَع غناك للكون
وانسى عذابك بقة .. وانسى طعم الشقى
ده الفجر شقشق سقى .. ورد الامل ميت لون
====
وسنين تجيب بعضها .. ومعادنا شئ ثابت
تطلعلى من عشها .. ولا عمرها غابت
شايلة الامانة وانا .. حاسس بطعم الهنا
لاهىَ خلفت سنة .. ولا فرحتى دابت
====
وف يوم من الايام .. وجع العجز جانى
قبل الميعاد بايام .. رجلى معندانى
مالقتشى غير ابنى .. مين غيره يخلفنى
وياريته ما سابنى .. راح ما رجع تانى
====
ولما غاب الولا .. واحترت فى دليلي
روحت المكان الخلا .. لقيته يا ويلى
قالت يا طول حزنك .. طمعه ماهوش ذنبك
لا هاتنسى يوم ابنك .. ولا هانسى انا ديلى!

عدت بنا الى زمن القصه الزجليه الجميله

التى افتقدناها منذ زمن . والتى تحتوى دائماّ عن البسمه

او السخريه . الموعظه والحكمه .

استاذ حسن انت زجال رائع ومتمكن وتعرف ماهية الشعر جيداّ

ارحب بك فى بيتك ومنتداك وسط اسرتك الادبيه التى شُرفت بك .

اهلا وسهلا بك وتقبل تقديرى ..