واحد صحيح

[

واحد صحيح

عايز اقولك ان لسة القلب عايش
مش جريح
واني هنا زي ما انا
واقف كما الجبل
اللي ما يتهز من
ايتها ريح
وان رجلي جذر ضارب من سنين في الارض
عيني ف السما
مش طير دبيح
انا مش هاسامحك يوم
لاني وبساطة
شخص عادي
مش مسيح
كل فرصة بدهالك كنت بدعي
تبقى اخر مرة فيها تغلطي
بس اني لما بتغلطي
صوتك بيضعف يتملي
حب ودفا
زي القفا
ارجع واشيل الطين
على كتافي
واشرب فـ حب بيتقلب
طعمة لخل وشيح
فمتساليش
فمتساليش
عن وش كانلك مبتسم
رغم الجراح
عيني اللي حبت طلتك
جي اليوم تشوفك تلتفت
عنك تشيح
و بتساليني مين انا
مستغربة
معلش حقك تسالي
تستغربي
فعلا انا مبقتش انا
طب هي جمله واحد بس
يمكن تفهمي
عدي السنين
اللي فـ حياتك كلها
واطرحي لحظة لقانا
يطلع الناتج انا
واحد صحيح

حاتم عبد الحميد 5/4/2013