أمى ما بتموتشى , مابتموتشى . . فى أى ظروف

إلى الأم العظيمة كُتبت تلك الكلمات عقب التنحى ,
عندما راودتنا آمال عريضة في تعافيها و النهوض من كبوتها .
لمن قرأها منذ عامين و لمن لم يفعل , أُذكِّرُكُم و أُذَكِّر نفسى مرة و مرات أخرى
بأنها لن تموت .
أمى ما بتموتشى , مابتموتشى . . فى أى ظروف

فى الطُرقة كان الرُخام بيبُخْ بَرْد و خوف
ع الدِكَّة قاعدين نِنام و وِشِّـنا مَخْطوف
نُبوس إيدين الدِقيقة , فوتى إعملى معروف

و ريحة البنج فايحة , و دكاترة جاية و رايحة
و ف صوتنا رعْشة و بحَّة دا غير مرارة جوف
و ملايكة الرحمة تضحك من غير حيا و كسوف

و بعد تلاتين سنة غُـلُـبْـنا نِنْدَهلُه
خرج علينا طبيب ماشى على مَهْلُه
بـينُـط من عينه غيظه و بيسبقُه جَهْلُه
كأنه راضع غباوة و بالضلال معلوف

جهله بإسم المريض , بمكانته و بشكله
شماتة كانت فى وِشه بتقول لى تستاهلو
سأل بآخر أيامة : مين من باقيت أهله ؟

أنا ياباشا ابنها و الست دى بنتها
أظن حاتقولي ماتت و كل شئ إنتهى
و دى إرادة الله . . و ده مصير معروف

غلطان أكيد فى المريض أو م الفشل قُلتها
دا انت البعيد مزغوف
واخد فلوس بالزوف
مش راح تموت . . حاتشوف
مابتموتشى . . فى أى ظروف

رميتوها فى المجانى . . جبناها فى المخصوص
بيعنا عليها الطين , غطِّينا فيها الروس
طاطينا للِّى ما يسوا و عاش ما بيننا لصوص
و لولا ستره علينا لجيت لكم بَلْبوص
باعلنها عالمكشوف
مش راح تموت . . حاتشوف
مابتموتشى . . فى أى ظروف

إوصِل وريد بوريد وإسحب صفايح دم
تمانين مليون كِلى فى ثانية راح تتلم
أو كبد فيه مشكلة أو قلب عاتل هم
الصحة متدهولة لكن حياتها أهم
شِبْعِتْ حُقن و سفوف
مابتموتشى . . فى أى ظروف
--------------------

ياما عليها من قبلك وَرَد حُكَما
حضنوا الولاد وإتشدَّقو بالعدل و الرحمة
حقنوا العباد بالبلادة و خدَّروا الهِمَّة
إستأصلوا فى الإرادة و نَصَّبوا الرُخَمَة
و تقل دم بزيادة إنْحَسَبوا ع الزُعَما
و ف كل مرة بيرجع عمرها المخطوف
مابتموتشى . . فى أى ظروف

سلامة ضغطها العالى
و نيلها و سدها العالى
مزاجها و حِسَّها العالى
دا سكرها يا ناس عالى . . دى داعية لى

ساعات بتروح فى غيبوبة
و باترَحَّم عليها ساعات
و فجأة تفُط لهلوبة . . و أول نُطقها . . عيالى
تقوم تطبخ و تِغْرِف لى , تأكِّـلنى و تحلف لى
أنا بخير يابنى . . دى رطوبة
تِحَّـمينى . . تِلَـبِّـسنى . . فالنة بكم مقلوبة
و تشغل لى كوفية من بواقى الصوف
مابتموتشى . . فى أى ظروف

واهى طالَّة علىَّ الليلة بشبابها
على باب العناية هرم بتنادى أحبابها
بِكر و رشيدة كإنه ما حَد خرَّبها
و ضحكتها علاج موصوف
و مشيتها قوام ملفوف
بنظرة لافيها لوم ولا خوف
و لا غُصَّة و مرارة جوف

مابتموتشى . . فى أى ظروف

القاهرة 13-02-2011

اخى الشاعر الجميل

حسن العربى

بالفعل مصر تنزف ولكن .. لاتموت .

نص جميل واسقاط اجمل على مصر الحبيبه

فى صورة المريضه والتى تبرأ من سقمها بحب اولادها لها .

احييك على صورك المتتابعه والتى اضافت الجمال للنص .

مودتى وتحيتى ...

بإذن الله تعالى ستتعافى و تعود لإحضاننا و نعود لأحضانها و نسعد بها جميعاً
الشاعر الكبير "عادل سند" أشكر مرورك الكريم و تفاعلك الإيجابى مع كل ما يكتب فى منتداكم القيم .
مع كل الحب و التقدير

السلام عليكم ورحمة الله وبركاته
أخي الكريم الشاعر / حسن العربي
نص ممتع
وتشبيهات رائعة
مصرنا ..إن شاء الله لن تموت
في انتظار جديدك أخي

الأخ الحبيب الشاعر "عماد عبد الحكيم"
لابد و أن سنخلص الدعاء لها لتتعافى من كبوتها بإذن الله.
شكراً عزيزى على مرورك و كلماتك الغالية.
لك كل المودة

إوصِل وريد بوريد وإسحب صفايح دم
تمانين مليون كِلى فى ثانية راح تتلم
أو كبد فيه مشكلة أو قلب عاتل هم
الصحة متدهولة لكن حياتها أهم
شِبْعِتْ حُقن و سفوف
مابتموتشى . . فى أى ظروف

نعم ايها الشاعر الرائع حسن العربي

هذا تعبير وطني رائع قد نفقد الدماء ( ونحن نفقدها ) قد نتخلي لها عن كبد او كلي

( ونحن نقدم لها ) ،، لكن حياتها أهم والملايين مستعدون للفداء

نعم هي لن تموت بإذن الله باقية ما بقي الزمن ونحن ذاهبون

أحييك علي حسك الوطني الرائع

بالمناسبة لا اسعي ابدا للتطابق من يسعي للتطابق يخالف طبيعة خلق الله للناس

فقط للموضوعية أخي الشاعر

كن دائما بخير خير وسعادة

بإذن الله ستتعافى و لن تضيع تلك الدماء سدى

الأخ الشاعر "محمود جمعة"

أسعدنى مرورك الكريم و كلماتك الجميلة
أشكرك شكراً جزيلاً و أشكر الإختلاف الذى يقربنا
مع خالص المودة و الإحترام

» اللروح ما بتموتشى
» بتبقى ظروف
» غنوة فرح فى ظروف عصيبة
» بيان ثورة 23 يوليو وأوجه التشابه مع ظروف ثورة 25 يناير