إنتى حكايتى

منيش قادر أقول انى محبتكيش
لإن الهمس دا بيدوى ف أركانك
ف تتصدع أمانيا
وتيجى الصبح تترجى
"دا كل الكون بإمكانه
يكون لفتة حنين منك
وأنا منك
بدوب نقصانة حنية"
فبخطف عودك المرمر
وأدور بيكى
وأدوق الحلم ب شفايفى ف الاقيكى
مزودالى المر
ف أقوم أغزل على نولى
عشان أنسى وأدوب تانى
الاقى الحلم يسبقنى ويسألها
يا بنتى لسه فكرانى
فتتمسمر ومتردش
أقوله إزاى محبتهوش منين يفهم
أجيبله منين جديد للمر
عشان يهدى
غريبة الدنيا دى جدا
مهيش ثابته
تجيبنى ف أخر الغنوة وترجعله
عشان قلبى دا متعود
لأخر شطرة يسمعله
ويستغرب
يعود من تانى يتقرب
لأقرب بنت
فيجرحها
ويفتح فيها حلم جديد
عشان تنسى
فتتكرر
نهاية القصة بين الغربة والترحال
مهيش عيزانى أكون رحال
ولا أهجركم
أنا من ضعفى ب أعذركم
وأقول تانى
أنا قلبى
مهوش سفاح ولا جانى
أنا الانتيكه ف المعرض
عشان الست تستعرض
وتتباهى ب سطوتها
أنا اللى برغم قوتها
كسرت الليل ب غشومية
لضم تانى
وتاه فيا
وغطانى ب صوت الناى عشان أسكر
لحد الفجر مسكرتش
وقمت أتوضى ب الذكرى
ورغم الجوع ف مفطرتش
عشان المر شبعنى
وأنا يعنى
مليش طاقة على جوعى
عشان أصلا منيش وحدى
حبيبتى ساكنه ف ضلوعى
بتقسمنى
وتزرع فيا شئ م الخوف
وترسمنى على الحيطه كما الملهوف
وييجو صحابها ع الضحكه ب صوت عالى
"وأنا مالى اديه واقف ومتسمر"
ف بضحك ضحكة ملو الفم
وتيجى وتانى تعتذرى
وأنا وبرغم كل الهم بدعيلك
متعتذريش
ونامى يا شاطرة ف الملكوت وصحينى
علي عينى
مكنش ف لستة المعرض
ضحية جديدة متضافة
باقدملك صكوك بوحى
هخلصلك خلاص روحى
دا انا أخرى هموت ليلة
ودا أخرك
تلف الشمس وتروحى
---------------------------
"عثمان

السلام عليكم ورحمة الله وبركاته
أخي الكريم الشاعر / أحمد عثمان
رائع أخي
قصيدة بها الكثير
وتشبيهات جميلة
في انتظار جديدك أخي