حاعيش بُكرة تانى

حاعيش بُكرة تانى

حاعيش بُكرة تانى . . و حانشِد أغانى
و أشاور عليكو و أطَـلَّع لسانى
و موتى النهارده . . أجازة لتاريـخـى
لغايـةِ ما روحـى تِـرُدْ فى مـكانـى

أنا عِزَّة النفس سافرت إعارة
و صرخة حقيقة فى ضلمةِ مغارة
و همسة عدالة بتلفظ نفسها
لا خاف منها ظالم و لا إدت أماره

و نظرة كرامة على معدة خاوية
و مارد شهامة مِكَتِّـف فى زاوية
و غضبة غلابة بتاكل لبابة
تُكالهم عليه مش على شله هاوية

أنا مجد حطونى رهن ف بنوكهم
و سيرة تزلزل سراير ملوكهم
غرورهم فى خيبتى . . حضورهم فى غيبتى
جلالى و هيبتى إشتروها بصكوكهم

أنا وِرث إبداعى تحت الحراسة
و زاهد و عابد رموه بالنجاسة
أنا صوت غُناها و ريحة هواها
حجزنى بتهمة إهانة الرياسة

أنا فكرة حرة حبيسة ف إزازة
و حلم ف عناية و ضحكة ف جنازة
و رحمة لدين لَـخَّـصوه ف جلابية
و جوهر ثمين لغمطوه بالطرازة

حاعيش لما ترجع جحورها الزواحف
يا إما تصوننى برأيىِ المخالف
تحرر شبابى . . تِرَجَّع شبابى
و تدخل سجونهم سِجِّـل المتاحف

مع كل حيضة لعفيفة . . حاعيش
مع كل نبته تِخضَّر عريش
مع كل نسمة . . مع كل بسمة
مع كل لقمة نضيفة بقريش
بهِـدمة كرامة و لو حتى خيش

بأمنى و أمانى و مش أى عيشة
مع كل ريشة تطير للأمانى
حاعيش بُكرة تانى . . و حانشد أغانى
و أشاور عليكو و أطلع لسانى
و موتى النهارده . . أجازة لتاريـخـى
لغايـةِ ما روحـى تِـرُدْ فى مـكانـى

اخى الشاعر الجميل

حسن العربى

راقنى فكرك وطريقتك الماهره فى زجليتك التى تنم

عن وعى وثقافه ودرايه بما يجرى من احداث داخل مصر

رغم غربتك ولكنك تعيشنا بكل ما نقاسيه .

اشد على يدك واحييك على براعتك فى النظم والوزن حتى نهاية النص .

مودتى وتحيتى ...

الشاعر الكبير عادل سند
أشكرك شكراً جزيلاً على كلماتك الرقيقة و تشجيعك الدائم , و أود التوضيح بأن غربتى هى مجرد غربة بالجسد فقط .
تقبل تحياتى حتى يجمعنا الله قريباً فى لقاء غير إفتراضى على أرض المحروسة بإذنه.

» ميـــــــــــــــلاد تانى
» مش هارجعلك تانى
» وافترقنا مرة تانى
» اعملك ايه تانى
» ورجعت طفله من تانى,