صاحب شيطان !؟

صب المرار والعدم

ع الصاحب الخداع

واكتب كمان ياقلم

صفحات عن اللي باع

سودها ع اللي ظلم

قلبي بسره انكتم

وسري عنده انذاع

واكتب كمان ياقلم
*****************
الكبر داء في الدم

يا ناكر الأخلاق

ماعملشي فيه الندم

غير الهروب م الداء

دفتر حياته كبير

يشطب أسامي كتير

واخد علي التغيير

ويبدل الأسماء

مايهمهوش أوجاع

واكتب كمان ياقلم
***************
النم عنده كيف

وحِرفته التزوير

ألوانه زي الطيف

لكن عدادها كتير

يظهر بشكل مُخيف

وأبالسته طوابير

ساجده وليه أتباع

واكتب كمان ياقلم
****************
الطيبه فيك ياقلب

بتطمع الناقصين

واللي تعامله بحب

يحسب عليك الأتنين

شُفت الوفا في الكلب

أكتر يابني أدمين

ما يعُض حتي إن جاع

واكتب كمان ياقلم
******************
وإن لُمت لوم والنبي

راجل مالوش أطماع

مايكونشي راجل غبي

ولا في الصحاب بياع

مطلب علي مطلبي

خليك جدع وشجاع

واكتب كمان ياقلم

سيبك من اللي ضاع


الشاعر / فارس القرشي

الحبيب الشاعر الجميل

فارس القرشى

حاولت اقتباس ولو جزء بسيط من نصك لكنى عجزت

فالنص كاملا من اروع ما قرأت عن الصاحب والاصحاب .

وانت شاعر لا تكتب إلا إذا اُستفزيت وهذا ما عهدته عليك .

فليتك تُستفز كثيراّ حتى نستمتع بأعمالك الرائعه .

احييك واشد على يدك ايها الشاعر الرائع .

مودتى وتحيتى ...