أيام

وصّيت ع الشاي
ورجعت أرتّب باقى حاجاتى
كتبى وأجنداتى
بقالي كتير ماكتبتش
ولا حتى قريت
قبلتني حاجات وكأنى باشوفها لاول مرة
فأستغربت
وحاجات خلتني ضحكت
وسرحت
فكرتنى باصحابى
وجيرانى القدام
الصنايع واللحام
ياااااااااااااه
أيام
أكله السردين ع السطح يوم الحد
الشاى اللى فحفح من فوق الاوالح
الضحك اللى خارج م القلب جد
ورامى ضله فوق كل الملامح
اول حاجة كتبتها ف البت عفاف
اللى كانت جنب منى ف تلتة رابع
واللى امى حلفت ميت يمين انى ماخدهاش
عشان قابلتها ببنطلون مرة .... ف الشارع
لعب الكورة اللى على فلوس
ودروس الميكانيكا ف غمرة
صلاة الفجر ف الامتحانات
والدقن اللى لحد السرّة
وسخافة مصيف بلطيم
ظلموة لعم حليم وراح راح
والقايم نايم بيهم اخويا صلاح
علشان خاطر ميرفت بنت خالتنا صباح
قهوة محى والقاعدة ف ميدان فيكتوريا
واللمة زى العادة كل خميس ف ازازة بيرة
والمكواة اللى يوماتى اتخانق
بسببها ويا اختى سميرة
ومابين ضحك وعياط وحنين للماضى بيهزنى
حسيت بشيطان الشعر جوايا بيوزنى
فجأة إترزع الباب حتة رزعة
دخلت بنتى وف ايدها كتاب
_ بابا
ماما بتقولك ماتجننهاش
لا هى فاضية لعربى ولا اى حساب
ولعت سيجارة واتنهدت
وضحكت
وبعد مازعقت عشان تأخير الشاى
رجعت أرتّب ....... باقى حاجاتى

الاستاذ والشاعر الجميل / رضا محمود
بشكرك جدا على مرورك وكلامك اللى مش عارف ارد عليه
اتمنى اكون عند حسن ظنك ويكون النص نال اعجابك
تحياتى لشخصك الجميل

أخى محمود
مرحبا بك في بيتك و منتداك
و أهلا بقلم جميل
استمتعت بالقراءة له
تقبل خالص ودي

شكرا للاستاذ عاطف الجندى / على كلمتك الرقيقة
محمود

السلام عليكم ورحمة الله وبركاته
أخي الكريم الشاعر /محمود كامل
نص ممتع
قصصي بلا عثرات
عشنا معك تلكم الذكريات
في النهاية
في انتظار جديدك أخي

الاستاذ / عماد عبد الحليم
شكرا جدا على كلمتك
اما مساله الجديد دى ف دعواتك معانا

شكرا للاستاذ / عادل عوض سند / على رأيك فى النص فأنت رجل جميل ورأيك شرف لى وأعتز به كثيرا
تحياتى