(الطير الجريح)

ياطير ياللي طلعلك ريش

بتتخفىَ كما الخفافيش

لو فكرت ماتجيني

بتوعدني تروح متجيش

بتنكر ودي وسنيني

ياطيري ياللي ناسيني

وعلمت البكا عيني

انا الدرويش

انا اللي لبست ليك الخيش

ولبستك دواويني

انا اللي صفيتلك النيه

انا ذادك وانا الميه

انا اللي بنيلك الغيه

وعليتك في اعلىَ مقام

انا السيد بقيت خدام

عشان خاطرك

رضيت امرك

وسلمتك مفاتيحي

وفضلتك علي روحي

تنام تصحىَ علي صدري

وتكسر ياضنين خاطري

ياطير ومعدي وسط الريح

بنص جناح

بقلب جريح

تقول سواح

بتشكي من الهوي تباريح

تغني قسوة الايام

وتلعن سطوة السجان

بصوت مبحوح

وبتغرد حلاوة روح

انا اللي استلقفك حجري

بخضه وخوف

وصحيت الامل بدري

عشان ماتشوف

عشان ماتلوف علي فجري

واول مانتشى حيلك

عزمت النيه علي هجري

ياطيري ياللي حبيتك

وطببتك وداويتك

بدمعي ودمي حنيتك

وانا لم دقت حنيه

ليه هٌنت عليك

وكان في اديك تواسيني

يا طير ياللى معاك روحى

تعالى و ردها ليا

°·.¸.•°°·.¸¸.•°°·.¸.•°®»تحياتى«®°·.¸.•°°·.¸¸.•°°·. ¸.•

(طاهر الصوفانى)