الطاووس !!

الطاووس
****************
معالي جناب الوزير الطاووس
ياماشي برزاله تذل النفوس
ياريت بس تهدا .. كفايه مناهده
لأن الحقيقه سيادتك كابوس
*************************
وصوتك بيزعج ملايكه وجان
وحتي إنبساطك مالوهشي أمان
وخلاك سكوتنا بقيت أُلعبان
وأبليس يجيلك وياخُد دروس !!
*************************
تحمر عيونك وترمي ف شرار
ودايماً بشرك أمورك تُدار
تلينا عليك الأيات الكُبار
إلهي ماتطلع عليك الشموس !!
************************
في كل المواقف تسم البدن
تحُط الفتايل وتعمل فِتن
وتدفع نفوسنا الضعيفه التمن
ونشكي لصاحب فيطلع جاسوس
**************************
مِسلم وِدانك لشِلة غجر
تِذكي النداله وتعمِل حُفر
لو كنت تِفهم حُدود الخطر
هتفهم ساعتها إننا مش تيوس
*************************
هنقلب عاليها واطيها عليك
ونُهجُر عملنا ونِفتح ماضيك
ونِفضح طريقتك مع اللي فوقيك
ولو يجي صفك عليكُم ندوس
*************************
طريقتك تخرب قلوب شقيانين
ويجمعنا ظُلمك مع المشركين !!
ونُحكم ساعِتها تموت مرتين
بِظلمك وخوفك وحيد النحوس
*************************
فارس القرشي
عضو رابطة الزجالين وكتاب الأغاني

اخى الحبيب الزجال الكبير

فارس القرشى

كان لى شرف قراءة تلك القصيده على الفيس بوك

واكرر .. انت فعلا شاعر وزجال قدير .

وهنا زجليه توضح مقدرتك الرائعه فى تطريز الكلمات

ومهاره عاليه فى توصيل الفكره .

احييك على نصك الاكصر من رائع .

مودتى وتحيتى ...

النص للتثبيت بواسطتى

تقديراّ لبهاء الحرف . وتقديراّ للشاعر .

خالص مودتى ...