خلاص..خلاص

خلاص..خلاص

يا بويا سِبْ لي الحبل عَ الغارب
أنا كِبِرتْ خلاص ..
مش ح عيش ف جُبِّتك ليوم الدين
أنا شلت الهمِّ بدري ..
و خلاص
ما عادشِ ينفع تدوس منابت الشوك
ونتَ بتهلل :
-من غير أبوك
ولا يعرفوك ياولدي
ولا يدوسوا منابت الشوك
لَجْلْ ما يجرحوك
تعلمت أطاطي راسي للموج
وَ إِبْ طالع وِطالب الخلاص
خلاص ..
جاه يوم الخلاص ..
خَلِّص مهمتك ياسيد الناس..
هات الكف وهات الراس
أبوسها ب صدق وْ إخلاص
اِطمئن ..
أنا راجل من ظهر راجل
وإيدي ب ألف إيد
سبني أشيل عنك
دا انتَ كْبِرت خلاص ..
م َعادش ينفع صهيلك
ولا وجع الراس
استريح ف دنيتك
ِزين ما خلَّفت يا بن الناس
خلاص ..خلاص.