أنا خلاص كده

أنا خلاص كده

شايف كثير وساكت
سيبونى أنفض شوية
الدنيا خلاص ماجت
والناس قعدة ملوية

بيقولوا ف التحريرشبان
واخدين عملات حية
والعملية جنان فى جنان
والرك عالنية

زرعت الفتنة مدام
بيقولوا أمريكية
دى مش عايزة كلام
أكيد صهيونية

قال آيه دفعت فلوس
حددت لمين هى?
وسابت الدنيا تلوص
يشكوا فيك و فيا

قاعدين فى نار الفرن
غداهم فول وطعمية
النهاية تخوين وغبن
وضرب ف العباسية

ماتيجوا نلم الإعتصام
ونشوف لنا حاجة ثانية
يمكن يبطلوا ملام
وتاخدوا راحة ثورية

ف مارينا للوزراء لسان
وبحرها أخدوه هدية
أنا جاتلى فكرة جنان
ما نعمل ثورة صيفية

ماهى كلها فلوسنا
نسيوكوا وماسألوش فيا
وياما تعبنا وحسنا
ماتيجى نهيص شوية

أهو يبقى إعتصام مفتوح
مننا للهواء والمية
يمكن الأسرار تفوح
ونعرف حاجات مخفية

حانلاقى هناك يخوت
مع لفتين ف المية
يمكن نصتادلنا حوت
ونشوف ف البحر جنية

وننزل المية نلعبط
نتدلع لحد الظهرية
بس أوعى ياواد تلخبط
بتخيلات وهمية

نجيب برضه لافتات
ونعمل مظاهرات شطية
بس دى بالمايوهات
يوماتى ساعة العصرية

وليلاتى نعمل لنا بارتى
نأكل لحمة مشوية
نعزم خالتك وخالتى
وننسى الهم شوية

نضرب يومين حلوين
لاميدان ولا بلطجية
ونشوف الإنتاج فين
بتاع الكلامنجية

ثلاث كلمات معروفين
بتوع الفلول المخزية
الإنتاج ومصالح المواطنين
واللى إسمها آيه شرعية

وقعدتكم ف الميدان
معطلة شغل الحرامية
مطالبكم بالميزان
وكمان عايزين حرية

لسه كثير طماعين
والرزالة مستوفية
اللى عملوه ف سنين
طالع من عينيه

الناس حقوقها كثير
وعندهم حسن نية
ودول نهبوا الخير
وحايوقعوا نفسهم ف الخية

بلاش إشاعات وتوقيعات
وألاعيب طفولية
وترجعوا المسرقات
يمكن نغفر شوية