الدنيا كتاب- قارئ (طارق سابقاً) منيب

تلاقي مـ الكتاب طبعات

وتلقى للكتاب أنماط

ساعات تلقى الكتاب غالي

لكنه رخيص من الداخل

ساعات من علمه بيلالي

لكن برضه القارئ غافل


ونفتح فـ الكتاب نقرا

فنلقى غلافه فيه صورة

وصورته اللي فـ الورقة

تخلي قلوبنا مأسورة

ونلقى الصورة تخدعنا

فنقرا الكلمة مبتورة


فيه ناس مكتوبة فـ الفهرس

وناس تانية على الهامش

ماأصل الدنيا بتدلس

وبتخلي الصادق كاشش

فأوعى ياصاحبي يوم تبكي

ده أنت الأصل فـ الهامش


وناس مكتوبة فـ العناوين

بخط عريض ورئيسية

وناس تحتيها فـ الترتيب

فقالوا عليها فرعية

وناس يحويها نص رتيب

بدون عنوان ولا ماهية


وناس أوراقها مـ الغالي

وناس غالية ورقها رخيص

ما أصل الغالي بقى بالي

وأصل الغالي برضه رخيص

تلاقي الأصل مش غالي

ويرخص والله حاجة تغيظ


وناس صفحاتها ليها فاصل

وناس صفحاتها متواصلة

وناس تعبت وبتواصل

وفـ الصفحة فـيه ميت فصلة

وتلقى الكل يتساءل

وينسى أماله فين واصلة


وناس فـ حياتها تلقى أبواب

وتحتيها فروع وفصول

وناس عاشت شيوخ وشباب

وكتبتها سطور موضوع

مهوش تعبير ولا إنشاء

وتلقى النشر بقى ممنوع


وناس عاشت طوت صفحات

طويلة وعمرها فيه كتير

وناس عدت عدد صفحات

وعاشوا العمر بس قصير

وفـ الآخر بنتساوى

وأعمارنا سبرتو يطير


وفـ الآخرة أهم كتاب

كتاب أعمالنا يوم الحشر

ونستلمه يمين وشمال

فنلقى السعد جنبه القهر

وكله بعمله يلقى حساب

ودار الآخرة دار النشر
............................