حلوة يا ... بلدى

موضوع: حلوة يا ... بلدى الأحد يوليو 08, 2012 10:08 am

اسمحوا لي بان أعود بكم الى عصر ما قبل الثورة... عصر التخلف والتحجر والظلم والطغيان
عصر مبارك ونظيف والشريف والعادلى والفقى وبدر وهلال وكل رموز التخلف التى ساقت مصر – اسف اقصد حكمت وتحكمت فى شعب مصر- ونزلت بها إلى قاع الحضيض والجهل والتخلف . واقبلوا أسفى لطول هذه القصيدة فما أطول طريق الفساد في مصر وإذا طاوعت قلمي وأخرجت ما اشعر به تجاه هذا الكم من الفساد لكانت القصيدة أضعاف أضعاف ما كتبت .
وقد كتبت هذه القصيدة قبل الثورة وللأسف ( الجبن ) منعنى من نشرها فى ذاك الوقت لان الجبن كان منتشرا بين جيلنا إلى أن جاء بعض الأحرار التى لا تبخل علينا بهم مصر من حين الى اخر وأنقذونا من غفلتنا وأعادونا الى الطريق مرة اخرى... وليتنا نسير على نفس الطريق ولا تتفرق بنا السبل من جديد فنتقهقر ونعود الى حيث كنا ،اللهم يسر طريقنا اليك وطريق امتنا الى النور والحرية والعدل والعلم والإيمان...

حلوة يا بلدى
قبل البداية بقول سلام
وما تزعلوش.... لو كان كلامى كالسهام
فالسهم دا.. حبة كلام
أما إل راكب ضهرنا
وسايقنا بالسوط واللجام
فتحية الف تحية ليه.....
ليه مننا.... أسمى معاني الاحترام
*****
وابدأ بمين ؟؟
وأبدا بأيه؟؟
ماهو كل واحد ف البلد..
مضحوك عليه
والقايمة واسعه وكلها...
ناس مجرمين...
*****
الاوله ... هى النضافة يا بلد
وعشان كبيرنا كان نضيف
نضفت ونضف كل حاجة ف البلد
بقت النضافة عندنا... اكبر شعار
وبقى ال مش شايف نضافة قبرنا – اقصد بلادنا وشعبنا -
راجل ح م ا ر.......
جوا المدينة والقرى
أو ف النجوع
وسط الشوارع والحوارى والبيوت....
كل الربوع
جوا البشر....
وسط النفوس الوسخة... بين كل الديار
صارت نضافة شعبنا....
اكبر ستار
صبحت شوارعنا مراية للكبار
باين صورهم زى نار الشمس والعه ف كل دار
تقدر تشوف فيها العجب....
بس انت راقب وابتسم...
من غير مرار
*****
والتانية .... فيك يا بلد....
هو السرور
من غير غرور
خللى السرور مالى البلد
زى القذارة والجهالة والضمير ال اتخرب
مرسوم على وش البشر...
زى العجب
مطبوع على كل المبانى والمدارس ...
والبشر...
مطبوع على وش الحياة...
حتى على ضهر الحجر
شرع حياتنا بالميزان ...
وبحق عبر عن ضمير الشعب تحت البرلمان
وبحق عبر عن لسان حالهم بحكمة واقتدار
من غير هزار
والحق بين الشعب عاد
والأمن بين الخلق ساد
ساوى ما بين عبد وأمير...
وغنى وفقير
والسادة نواب الامانة المخلصين
صانوا امانة شعبهم
رسموا طريقهم... مجدهم
فتحوا جيوبهم – قصدى بيتهم – للغلابة المظلومين
شغلوا قلوبهم بالمصالح – قصدى بظروف البشر – المطحونين
راقبوا الجميع.. وكبار صغار..
بس الكبير لو لحمه ناشف هيسبوه
اما الصغير ... يتشوى.... او يتقلى...
او حتى نى هياكلوه
ما بقاش ما بينها وبين جميع الخلق فاصل او جدار
بصراحة دول نواب ونعم الاختيار
تزوير وجابهم باقتدار
*****
والتالته .... غالية وكله غالى ف البلد
غلا التراب من تحتنا
والمية والطين والهوا
بقى كله غالى يا بلد
ما بقاش رخيص فيك يا دوب.. الا البشر
والغالى راكب فوق رقاب الخلق شافط دمهم
مش برضه غالى وحقه يركب ضهرهم ؟؟
ساب الكبار يتمرغوا بين عزهم
علشان ضهورهم عاليه ايه يعمل لهم ؟
وركب على ضهر الغلابة يسب يلعن امهم
والغالى عايش فوق جزيرة – لوحده – دون كل العباد
شاف البشر أعداء فاعلنها ... جهاد
والجيش معاه
وحكومة نايمة ليل نهار ... تجرى وراه
وفرض عليهم كل انواع الجباية... عشان ينشف دمهم
مش هو مالك امرهم !!!
*****
والرابعة ... عدل وكله عادل ف البلد...
من أول المأمور لحد العسكري
اهين واه على كل ظالم مفترى
والحمد لله البلد .....
مافيهاش لا ظالم أو حرامى ومفترى
مافيهاش موظف مرتشى
دا العدل متسلط على رقاب العباد
حاطط عيونه ف كل شارع... كل اودة... وكل باب
ركــّب على بق المظاليم ميت لجام
ولحم على باب الحقيقة بميت لحام
والكل راكب فوقه عفريت او شيطان
عايش ومربوط جوا خوفه ... كالجبان
والعدل محتاج ناس كدا.....
ترضى الهوان...!!!
*****
والخامسة ... فيك هو الشرف !!
علشان شريفك م الاعالى وهو فيك ابو الشرف
شرفنا فى كل المناصب والمتاعب والقرف
شاور علينا ف قعدته...
لما جمع يوم شلته
وعرف يصنع ف الهموم !!!
وازاى هنوصل للنجوم !!
وازاى هييجى اليوم وهنصنّع ... بقر
يمكن تحل جميع مشاكل شعبنا...
ونعود بشر...
*****
والسادسة ... فيك هو الأنس ..
أُنس وثقافة ومعرفة
تقدر تقول ...
أبو الليالى المشمسه
فقهنا ف الدين الحنيف
عرّفنا ايه الفرق بين اسمنت ابيض.... والرغيف
ونـّــس حياتنا بالاغانى المسخرة
توه ولادنا فى المياعه والخلاعه ..
والضياع والبهدله..
قلّع بناتنا فى الشوارع من عاداتنا ...
ومن ضميرنا ... ومل هدوم
بقت ال لابسه تبقى جاهله وكله يضحك...
هات يا لوم
حتى المبادئ والقيم
صبحت ف ايد المبدعين
وصبح نجوم الفن هما المصلحين
علماء... نجوم... دنيا ودين
وبقية الخلق ال تاعبه نفسها...
ف الرزق أو ف الحق حبة مجرمين
اما ال ضيعوا وقتهم... واتعلموا....
دول فى القبور متحنطين !!
*****
والسادسة ... فيك يا بلد
الله على حكم القدر
لما كتب...
ان ال يبقى وعن عمد....
مسؤول على علم البلد
بدر وهلال..!!!
والحكمة كانت اختيار !!
يكفينا ننطق اسمهم
تتحل كل المشكلات...
يكفين منهم... ذكرهم !!
اسمين ونورهم غطى نور كل الشموع
اسمين وخيرهم طفى نار كل الدموع
وبقينا فى القمة بعلومنا وفوق علوم كل الشعوب
والعلم اصبح شغلنا... ورجع ضميرنا ف القلوب
حققنا اعلى الانجازات...
ف الفهلوه..
وكشفنا كل المعجزات...
ف الشيطنه...
والبحث حقق حلمنا
والعلم نور دربنا
والبدر شعلل والهلال...
غطى على نور شمسنا...
*****
والسابعة حتى الاخرة ... فيك يا بلد..
أسماء وناس ملهاش عدد
والله على الشعب ال طول عمره ف غم وهم لكن.....
ما همد
والله على الشعب ال واقف... فوق رجوله... كالوتد
وطمع جميع الخلق فيه...
لكنه واقف كالأسد
والله يعينك يا بلد .!!
كل ال عايش وال ميت وال لسه هيتولد...
*****
وف النهاية بقول لكم....
مبروك مبارك ابن مصر....
دا اخدنا من أمجاد لنصر
لما ابتدينا باسرائيل
والحرب دايره نهار وليل
وسرح على الاقصى وحرر قبضته
وجمع حماس مع ضفته
وغزا الافارقة والعرب
بالسلم لا بالعنطظه
وجعلنا اول ناس تعانى م المرض
وجعلنا افضل ناس تناجى ربها...
وتقول ف كل نهار وليل....
يا رب فيك انت العوض..
حتى انتهى بالمظلومين
وحكومة اعلنت الجهاد... ع المطحونين
ورفع رايات الانتصار
وقهرنا وبكل افتخار
والله معاكم شعب مصر
الله معاكم شعب مصر
***** جمال نصير فى 25 /5/ 2010
[/b]

هههههههههههههههههه

لو كتبت هذا النص فى عهد مبارك

واحتفظت به حتى فى عقلك فانت بطل

ولابد وان تحصل على جائزة اجرأ شاعر

دام الابداع

اخى الشاعر الجميل

جمال نصير

لك كل الحق ان يُدفن هذا النص طوال تلك السنين .

لكن اقول لك :

اقسم بالله العظيم نحن هنا فى الاسكندريه كنا نقول فى قصائدنا

ماهو افظع من ذلك . ولا انكر اننا تصورنا من قبل امن الدوله

وسجل لنا صوت وصوره . ولكن كل ما فعلوه انهم هددونا فقط .

عموما نحن كنا نعيش عصر العبيد والساده ونحمد الله اننا تمكننا

من كسر قيود العبوديه وعدنا احراراّ .

نص جريء بالفعل . ورغم مباشرته لاسماء معينه إلا انه اصاب

كبد الحقيقه المؤلمه . احييك على نصك الجميل .

مودتى وتحيتى ...

أحمد رجب معيط كتب:: هههههههههههههههههه

لو كتبت هذا النص فى عهد مبارك

واحتفظت به حتى فى عقلك فانت بطل

ولابد وان تحصل على جائزة اجرأ شاعر

دام الابداع

اخى الحبيب الشاعر احمد.. شششكرا صديقى العزيز على كلماتك الطيبة ... عموما عدت على خير وربنا سترها... هههه

عادل عوض سند كتب:: اخى الشاعر الجميل

جمال نصير

لك كل الحق ان يُدفن هذا النص طوال تلك السنين .

لكن اقول لك :

اقسم بالله العظيم نحن هنا فى الاسكندريه كنا نقول فى قصائدنا

ماهو افظع من ذلك . ولا انكر اننا تصورنا من قبل امن الدوله

وسجل لنا صوت وصوره . ولكن كل ما فعلوه انهم هددونا فقط .

عموما نحن كنا نعيش عصر العبيد والساده ونحمد الله اننا تمكننا

من كسر قيود العبوديه وعدنا احراراّ .

نص جريء بالفعل . ورغم مباشرته لاسماء معينه إلا انه اصاب

كبد الحقيقه المؤلمه . احييك على نصك الجميل .

مودتى وتحيتى ...

استا عادل.. ياعم احنا مش قد بتوع الاسكندرية .. احنا هنا فى القاهرة المقهورة... شكرا على مرورك الطيب

» مصر بلدى
» يا بلدى
» مصر بلدي شعر محمد البهنساوي
» ياابن بلدى
» لكى يا بلدى أعود!!