أيوه أنا مصري

انا قمت يا درويش أهوه

لكن بعد الزمان بزمان

انا الحر كريم العنصرين

اللي مفيش م معدني انسان

ابو الهول والهرم شاهدين

ليوم الدين ع اللي فى الميدان

والميدان مش مجرد مكان

الميدان عرش الشعب والصولجان

اللي فيه حكم الشعب كله

وأمر برحيل النظام اللي خان

عطشان يا نيل شربني غريب

يا بلادي خديني بالاحضان

ايوه انا مصري مش ناصري

ولا علماني ولا ليبرالي ولا اخوان

انا اللي حفرت القناه وعليت الهرم

وعبرت وبنيت السد فى اسوان

انا ابن النيل يا شمس واللي بيسري

جوه شراييني هوي الاوطان

مهما عانيت بحبك ومهما آسيت

لا هنتي ولا خنت ولا كنت جبان

حاربت وانتصرت عليت وعمرت

مصر يا كتاب التاريخ أنا العنوان

يا كل صفحات الزمن دفعت التمن

وكنت انا الزمان يا قمر الزمان

يا مصر قومي اغسلي شعرك فى

نيلك وسمعينا ضحكتك زي زمان

بعد ما تحني ترابك بدمنا من حقك

تفرحي وتلبسي للفرح فستان

تسعين مليون عريس جايين

يزفوكي يا فرحتك بالعرسان

انا عريسك ومحدش مني هيخطفك

لانك الروح والدم والشريان

مصري ايوه انا مصري غنيتلك

وبغنيلك وهغنيلك يا مصر بالاحضان

بالاحضان يا مصر يا حرة بالاحضان

بالاحضان يا مصر يا غالية بالاحضان

بالاحضان والفرحة فى عيني وقلبي

آخد كل الشعب المصري بالاحضان