خناقه مع الفقر

(خناقه مع الفقر)
هجم النشع ع السّكن بوّشْ حيطان الدار
والفقر لابد فى ركن الصاله ليل ونهار
حشرات كتير شكلها كالح وبتصاصى
تبات فى راسى وتقرض زىْ بوز الفار
,,,,,,
ومعاها فقرى الدّكر وشْ البعيد منحوس
رجله التقيله بغشم فوق أىّ شئ بيدوس
واقفلى حارس على بابها وشبايبكها
خايف يسبـبها لايدخل من شقوقها فلوس
,,,,,,,
حاولت أصاحبه وباتمنىّ يروح فى النوم
وأتخبّى منـّه وأهرب من البلد كام يوم
ألاقيه مبحلق عنيه منىّ هنا وهناك
ويقول لى باعمل معاك بوصيّة المرحوم
,,,,,,
عمللىّ ثورة وجمّع صُحبته مليون
قعدولى جنب البيت ولاغونى فى التليفون
وقالوا يسقط نظامك قوم بقى وارحل
ومهما يحصل هدفنا فى البلد مضمون
,,,,,,
شتمته مرّه لكن كتــّرْت من عيبى
راح ساق عليّه ابن عمّه وخالى ونسيبى
مدّيتله ايدى أصالحه وحالى متلوّع
أتاريه مكوّع ومادد ايده من جيبى
,,,,,,
راح ماضى منه يمين لازم أبوس رجليه
وادّيله حقه ومافيش حيلتى حاجه تكفــّيه
مضيتله وصل الامانه وقلتله يملاه
هرش ساعتها ف قفاه وقال خلاص حا اشكيه
,,,,,,
وبصْ ليّه بقرف من تحت لمـّا لفوق
وقال لى أمّا صحيح انسان قليل الزوق
طول عمرى عايش معاك ع الحلوه والمُرّه
وكل مرّه أقول سيـبه وبكره يفوق
,,,,,,
كان اللى باقى على العشرة يادوب سٍنـٍّه
آدى آخرة الشرّ ودخول الغريب بينـّا
عيشك وملحك مع ولاد الاصول له كوم
والفقر مظلوم واتارى العيب طلع منـّا
,,,,,

معبره و جميلة أستاذ سعد
أبيات سعدت بقراءتها و بمرورى عليها
تحياتى

الله ينور يا ابو سعد

انت زجال جميل واعمالك تشد القاريء والمستمع .

احييك على نصك الذى راقنى بالفعل .

مودتى وتحيتى ...

تثبت بواسطتى ...