كعب الليل

نشوة لُقانا الفجرية

بتفر من شوارعنا..

بلا مواصلات و لا معنى..

و كعب الليل بيشرب خمرا

من غير كاس..

بيحرس نفسه من نفسه

بدون حُرّاس..

جفون نايمة على مخدات

تغمض جوا منها آهات..

نهود وردي لمسها الطيف

ف شهد رحيقها اتنفس..

هب الريح و طار الكون

و لسًاه بيها متشبث..

و شجرة مطرّحة لولي

ف قعر نهر من عنبر..

على الضفة ضفاير حِنة تتغندر..

نجوم تغفل

تميّل بين كعوب ارضنا العارية

تعوم امواجها ف كعوبها ولا الجارية..

تِلذ اللذة تتلذذ ف اوتارها..

تموت لذة

تعيش اُخرى على تارها..

تنغبش ف القبور تنبش

و تمحي حبر متنعكش..

بحور تجري على سِلّم

مهوش طالع ولا نازل..

لكن محتار..

ما بين عشق النخيل و الورد يتغازل..

.....
ادان و جرس و فجرية

و لقمة طرية و هنيّة..

و بال مرتاح مهوش جَرّاح

و ريق مسقية و عفيّة..

نهار طالع على العارية

و مش ناوي يغطيها..

بشمسه يحب يكشفها

بحَرّ السيل يدوخ فيها..

و يرسمها ملامح تانية مش هيّ

و ملامحها ف عتمة طرحة يخفيها..

....عبدالرحمن هاني

الاستاذ الشاعر

عبد الرحمن هانى

نص جميل وشاعر جيد ننتظر منه التألق السريع

راقنى حرفك واسجل اعجابى .

مودتى وتحيتى ...