من محاولاتى فى الموال الربعاوى

ياللى ابتلاك القدر خد م الجلد مقادير*
دا الصبر أحسن دوا أوعاك تقول مقادير**
ربك قادر ينصفك ياك فاكرة يوم ينساك
ارفع يداك للسما يرفع قضا المقادير
*بعض منه
**مش قادر

---

بحق من صورك بالحسن دا وحلاك
خبرنى كيف قسوتك من كلمتك حلاك
سايق دلالك وحالك من يمين لشمال
واتبدلت لاحوال ماعرفت يوم حلاك *
* حال لك

---

أنا اللى صبر الجمل علمنى اكون صبار
صابر كما اللى صبر على قضا صبار *
لا لعنت يوم الزمن ولا جفاف صحاريه
واداريه ف قلبى المرار حنضل على صبار
*صاب بار

---

اللى احتمت بالدجل تفرغشى من زارها
صابها المرض م الهبل وتخض من زارها
كياده كيدها غلب كيد النسا وإبليس
شوفها تقول يامغيث من قبح منظرها

---

داب توبى على جتتى . توب ذلتى مابلاش
دنا لو رضيت ربنا كان البلا مابلاش
ماشى ف طريق الشيطان ويوماتى ابات متهان
ولا توبت عن عصيان وباقول يارب بلاش