خد ايدى

(خد ايدى)
سعدالشرقاوى
يا اخويا المصرى هات ايدك
على ايدى اللىّ عرقانه
دا نبض القلب بيريدك
نفجّر ثورة جوّانا
عشان الارض تتعمّر
وقلب الصحرا يتخضر
نقول للفكر يتغيّر
وكل الشعب ويّانه
,,,,
تعالى نعصُر امبارح
وناخد م العصير ذكرى
ونتهنى بأمل طارح
سنابل فرحته لبكره
تعالى نبدر الايام
تقاوى الخير تبان قدّام
ونعمل للبلد خدّام
ونحمى مبادئ الثورة
,,,,
ما يالله نلبىّ رغبتها
وأنـّتـْها اللىّ بتنادى
بصوت بيشـُق دمعتها
يقول الهمّه ياولادى
دا عودى لسّه فيه الروح
وقلبى م الهوى مجروح
لأمته ح تسيـبونى أنوح
وبأستعطف فى جلادى
,,,,,
ولادى وخدْتكم كومى
وقسمة عمرى وسنينى
وعايشه لأجلكم يومى
وشباب الدنيا فى جبينى
شيلونى وافرحوا بيّه
وساووا الكوحله فى عنيّه
دموعى كات مخبـيّه
أمل بـيْأجله نومى
,,,,,
بافوق الصبح على فرحه
ناقصها الورد والحنه
ومارد كل يوم يصحى
يطوّل فى الطريق بنـّا
بيخطف نظرة العيله
ويعمل فيّها ميتْ حيله
يخللىّ خطوتى تقيله
وأنا مش قادره استـنّه
,,,,,

اخى الحبيب الشاعر الجميل

سعد الشرقاوى

زجليه راقيه من شاعر تقيل وحرفه رائع .

احييك على براعتك ومهارتك التى عهدناها عليك .

تقبل مرورى ومودتى ...