قصيدة شيزوفرينيا

كت امى تقول وانا صغير..
حسن راح يبقى شئ تانى
حسن قلبه رقيق اخضر ..
حكيم والحسن ربانـى
وخوفت الصورة تتغير ..
حاربت بايدى وسنانى
عشان الحلم يتفسر ..
يجينى بكرة يلقانـى
كبرت وكل يوم باكبر ..
وجه بكرة وعدانــى
لقتنى بقيت ولا بيدى ..
موظف صدفة موش قصدى ..
ينادونى حسن افندى ..
وضاعت كل احلامى
مابين الكرسى ابو مسمار ..
وحيطة مشققة بتنهار ..
ولمبة نص نورها هزار ..
سجين بقضى ايامى
قالولى ان الدوا ف الصبر ..
صبرت كتير واتارى الفجر
خيال شاعر قصير العمر ..
ياريته حقيقة قدامى
انا قلب اتقسم نصين ..
خيال سابح بلا شطين ..
ودنيا وبيت وناس عايشين ..
وبينهم حيرة وخدانى
لنا قادر اشيل همى ..
و لا عارف اعيش حلمى ..
ياريتنى فضلت يا امى ..
وليد وايديكى شايلانى
منايا اعيش حياة تانية ..
حياة اختارها بالثانية
حياة مافيهاش شيزوفرنيا ..
وموش محتاجة نفسانى

الاستاذ الشاعر

حسن صابر

اولا هذا النص ليس نثر .

انما شعر وموزون وانت كتبته بطريقة القصه

الشطرات جانب بعضها البعض . وتلك كتابه خاطئة للشعر .

لكنك شاعر جميل ووضح هذا من كلماتك الجميله وفكرك الاجمل

تم تنسيق النص كما يُكتب الشعر .

مودتى وتحيتى ...

يُنقل النص الى صفحة الشعر

العامى .. للتخصص ...