عايزين ريس

(عايزين ريّس)
عايزين ريّس مش كدّاب
ولا مترشح من أحزاب
ولا متخبىّ ورى الابواب
ناوى يسيطر بسْ علينا
,,,,,
عايزين ريّس مش من دُول
ولا م الوطنى وأصله فلول
محتاج كرسى و مش مسئول
عن احلامنا وعن امانينا
,,,,,
عايزين ريّس قلبه علينا
مخلص شهم ياخد بادينا
ويشيل عنــّا مرار العيشه
يمكن يمسح دمع عنينا
,,,,,
عايزين ريّس شكله كويّس
مش قرفان م الناس ومتيّس
ولا متشدّد ولا بيهدّد
ولا بيْـبدّد خير أراضينا
,,,,,
عايزين ريّس من انواعنا
عمره مايقبل مرّه يبيعنا
صاحب فكر وقلبه يساعنا
مشْ متعقـّد من اهالينا
,,,,,
عايزين ريّس ابن بلدنا
يقدر يحفظ حق ولادنا
يحمى صليبنا ويحمى المادنه
ويحمى ضيوف البيت والمينا
,,,,,,
عايزين ريس حاسس بينا
ويكون صادق لو يحاكينا
وافى بوعده صاين عهده
ولا بيخبىّ حقيقه علينا
,,,,,,
عايزين ريّس شاف ويّانا
سنين المُـرْ وعاشها معانا
وأهله من الناس الشقيانه
عارف حالنا وحاسس بينا
,,,,,
عايزين ريّس من جلدتنا
عمره بياكل من لقمتنا
لأجل يحافظ على كرامتنا
وعمره مايقبل يوم يأزينا
,,,,,,
عايزين ريّس عارف ربّه
شهم وكل الناس بتحبّه
يبقى الشعب امانه ف قلبه
ويعطف ع الناس المسكينه
,,,,,,
عايزين ريّس مصرى أصيل
شارب من فيضان النيل
مش متحالف ويّا عميل
أو مصنوع من ايد أعادينا
,,,,,,
عايزين ريّس عاشق خيرنا
مش موزوز من عالم غيرنا
لمّا حايصبح بكره كبيرنا
حايشرّفنا ويملى عنينا
,,,,,,
عايزين ريّس ويكون غيركم
بعد مابان للكل ضميركم
مش قابلين نسمع لسيريتكم
غلطة عمْر وجات بايدينا
,,,,,,
لمّا نكرّرْ يوم غلطتنا
وندفع فيها تمن أمتنا
يعنى الحق ان قولنا ياريتنا
يبقى عليكم واللا علينا
,,,,,,

والله صدقت فى كل كلمه كتبتها ..

اخى الشاعر

سعد الشرقاوى

ربنا يوعدنا بواحد فيه نص المواصفات دى ..

والله يبقى يا بختنا .. لكن نأمل خير ان شاء الله .

احييك على نصك الجميل .

مودتى وتحيتى ...

يتم تثبيت النص تلبية لطلب الاخ طاهر

بعد اذن الساده المشرفين .

نص جميل يا فنان
دام الابداع
واحلى تحيه