احنا عايزين ايه

عارفين مش مبسوطين
ف الدنيا ليه
عشان محناش عارفين
احنا عايزين ايه
بندوس ... ننداس
ماشيين وخلاص
وكل واحد مننا
عمال بيندب عاللي فيه

عارفين ايه الحكايه
اننا قودام مرايه
فيها معكوسه الصور
واحنا ملايين الضحايا

وكل واحد همه وشه
يبقا زوم والناس تشوفه
مش ف انه يلاقي نفسه
أو يشوف الناس بذوقه

الحكايه اننا بنحلم كتير
بس مش عارفين بايه
المهم ان احنا نكبر
مش مهم ازاي وليه

الحكايه اننا بنحلم نطير
واحنا ليل ونهار شخير

لما كنت ف الابتدائي
حلمي كان بـ الاعداديه
واما حققته بغبائي
قومت اقول نكبر شويه
جبت حلم ف حلم تاني
يلا بره القريه ديا
هبقا نجم ف مصر عالي
والبنات هتموت عليا

وابتديت ف السكه أحبي
اتفتح مليون طريق
هوبا انوط وحبه اهدي
يوم اعوم واتنين غريق
واللى كان مساعدني اني
كنت زي الخيل جرئ
كنت ف كل سكه بجري
بس كان ف النفس ضيق

لما ما طلعتش لفوق
فجأه ملقتنيش بكيت
قولت اجرب اني افوق
بس بعد ايه صحيت

كان معايا الوقت بدري
اني اشوف ف مرايتي نفسي
كان معايا شباب بيدي
كان قبالي طررريق ف وشي

والغلطه كانت م البدايه
اني محددتش هدف
مع اني قدراتي ف صبايا
تسمحللي اجيب مليون هدف
عملت زي اللي ماكلشي
واول ما شاف أكل اتحدف
وكنت عايز كل حاجه
بصيت لقيت كله اتحزف

والنهايه اننا
نفس الحكايه كلنا
وكل واحد مننا
بيهمه نفسه والـ أنا
.

رضـا عثمـــان

اه عندك حق

يعني كان لازم تتك علي الجرح اوي كده ؟؟

بس معني جميل ربنا يبارك فيك .......... تحياتي

الشاعر الجميل الاخ الكريم رضا عثمان

سؤال من زمااااان بدون أجابة ؟؟ وسيظل أخي الكريم محور للابدعات من كل

جنس أدبي ...ولكنك تناولته بذكاء ،، استعملت طريقة الفلاش باك في السينما

لتستعرض لنا حلم كل مرحلة ،، ثم قفزت علي الحاضر الواقع وقلت لنا بجمال

سبب غياب الاجابة :

والغلطه كانت م البدايه
اني محددتش هدف
مع اني قدراتي ف صبايا
تسمحللي اجيب مليون هدف

جميل نصك فكرا ومضمونا وشعرا

لكن لي ملحوطتين .. الاولي هي الاخطاء الاملائية ،، وموهوب مثلك علية ان ينتبه لمثل هذا ( قودام - قومت - أنوط - آتحزف ) والاصل ( قدام - قمت - أنط - أتحذف )

الثانية هي هناك بعض التعجل أوقعك في مخالفة الوزن ولكنه والحمد لله في مواضع قليلة

ولكن هناك صور كثيرة رائعة آعجبتني مثل :

وكل واحد همه وشه
يبقا زوم والناس تشوفه
مش ف انه يلاقي نفسه
أو يشوف الناس بذوقه

ومثل:

واللى كان مساعدني اني
كنت زي الخيل جرئ
كنت ف كل سكه بجري
بس كان ف النفس ضيق

أخي الرائع رضا عثمان أرجو تقبل ملا حظتي فوالله لا أريد لك الا كل الجمال

والاكتمال فأنت شاعر موهوب

أعجبتني قصيدتك وأسعدتني

فللك خالص الشكر والتقدير

الله عليك وعلي فكرتك ونقدك للتفكير الأنوي المتفاوت بين البشر بنسب
استمتعت هنا اخي رضا بقصيدتك وبتحليل الاستاذ محمود الذي اتفق مع ملاحظاته وان كانت قليله كما قال هو ولا تؤثر فعلا في النص
تحيتي وفي انتظار ابداع اخر يا شاعر

الشاعر/ رضا عثمان
ليه بتقول أنك ماحققتش حلمك
مش كان من ضمن الحلم * والبنات هاتموت عليا * يعني ده ماحصلش * أكيد حصل دا انت مولعها رومانسيه
عموما قصيده كالمعتاد جميله

الشاعر الجميل / رضا عثمان

الله الله عليك

وعلي حرفك الرائع

دمت مبدعاً كما عودتنا

اخى الحبيب الشاعر

رضا عثمان

هو نص جيد فكرياّ . واستخدمت مفرداتك التى اوضحت هويتك

الثقافيه . واجدت فى الطرح .

ولى نفس الملحوظتان لاخى محمود جمعه .

كنت سأتكلم عنهم ولكن اخى محمود سبقنى فى هذا .

تقبل مرورى وخالص مودتى ...

الشاعر الرائع/رضا عثمان

احسنت ما قدمت وكتبت راق لى وجودى هنا

تقبل مرورى واعجابى بقلمك

كلامك الشعري ..يجعل الواحد يقتنع ..بالتدريج ..وهذا ما ميز النص ..التدرج في نقل الفكرة ..طرح مميزونص رائع ..ودمت لنا مبدعآ

الأخ الفاضل رضا عثمان

جميل جداً تعبيرك

اللى قالته القصيدة وكان العنوان موفق للمضمون القفصيدة

التى تطرح الكثير من التساؤلات

فى احنا عايزين ايه

فعلا ياريت نعرف احنا عايزين ايه

أكيد هاتفرق كتير

ميرسى جداً لإبداعك

استاذنا الجميل عطيه شواش
اعزرني بقا تلميذ لسه بيتعلم وراح شاطح مره واحده هههههههههههههه
انا دايما بدور عالجديد وافتش عاللي بيتعبنا واظهره في قصايدي
او انتقد سلوك فينا أو أسخر على أخطاء بنقع فيها دايما
دمت بخير استاذنا

الشاعر والأخ الجميل محمود جمعه
أولا يسرني جدا رؤيتك وتعليقك
ثانيا أنا لا أدعي التواضع وأقبل النقد بصدر رحب وأحب أشتري
عشان اتعلم ، أنا عمري في الشعر جمبكم ثواني ومحدش علمني مواجهة ولا بدون مباشره ، المشكله اني زي ما قولت ف القصيده مفجوع شعر مع العلم بان الشعر بحوره كتير ، فتلاقيني ممكن ألوش شويه مع العلم أيضا اني بلوش عن حق ، لييييه ،
اولا بتطرق لمواضيع وبتكلم فيها تفصيليا واحيانا بتحكم قافيات وألفاظ معينه ببعض الميل ولكني اعترف بالميل واذا أردت أن أجعل القصيده من أولها لأخرها بنفس الكيل لفعلت ولكني أمل الرتم الواحد
وكنت أحب انك تنسخللي الأبيات اللي ميلت فيها وده عشان اوضحلك وجهة نظري ، الحاجه اللى بعد كده انا عندي أفكار للكتابه بطريقه جديده ودي مش فزلكه مني ، بس الأفكار وارده والاعتناء بيها نهضه علها تنجح بمشيئه الله .
أما بالنسبه للأخطاء الاملائيه فلو لاحظت اني معنديش برنامج التشكيل فلو وضعت الألف هكذا (ا) فاعلم أنها اما الف مد أو مكسوره هكذا ءاسلام ههههههه
اما عن انوط وافوط وهكذا فوضعت الواو للتسهيل على القارئ فحسب
معلش طولت عليك وأسف على التطويل لكنى والله بحبك في الله وفتحتلك قلبي
وياريت تبقا تنسخ الابيات اللى انحرفت عن المسار
دمت بكل حب وخير خي الحبيب

الشاعر الجميل والواعد أحمد عبدالرازق
سرني جدا مرورك وأسعدتنى به
وان شاء الله أكون عند حسن ظنكم

شاعرنا الجميل فارس القرشي
ههههههه انت لازم تفتش يعني على دي بالذات
وعموما خلاص راحت علينا
نورتنى والله وشرفتنى بمرورك

شاعرنا الجميل محمد عبدالواحد
أسعدني جدا مرورك وشرفني
دمت بكل حب وخير

أستاذنا الكبير والجميل عادل سند
سمعا وطاعه ولكم الفضل بعد الله في كوني شاعرا
وان شاء الله ءاملائيا سهله وأحتاج فعلا لارشادكم وتوجيهكم بنسخ المنحرف وكيفية معالجته حتى تصل المعلومه كاملة
دمت بكل خير استاذنا

الاخت الشاعره الجميله بسمة الورد
شرفنى جدا مرورك الكريم
دمتى بخير

الاخت الشاعره الجميله بلقيس
يسعدنى جدا أن ينال نصي اعجابك
شرفني مرورك اختى واسعدني كثيرا تعليقك

الاخت الشاعره الجميله رشا فؤاد
اولا ليكي وحشه والله
وثانيا أسعدتنى جدا رؤيتك
دمتى بكل خير

الله عليك...
ياأخي سبحان الله العظيم..لديك نظرة عميقة للأمور وخبرة في الحياة تستطيع بكل سلاسة ودون تعقيد شعري مُفتعل أن توصلها للمتلقّي بكل هدوء وبأسلوب ومفردات واضحة كاشفة مباشرة ـــ ومن وجهة نظري المتواضعة ـــ أرى أن هذا عين الإبداع فليس شرط أن تفيض القصيدة بالصور والتشبيهات والمحسّنات البديعيّة التي لا تخدم المعنى وقديماً قال الحكماء..خير الكلام ما قلّ دَلّ
أخي الشاعر الراا ائع...أستاذ رضا عثمان
أسعد الله قلبك قدر إستمتاعي بقصيدتك وتجربتك الصادقة

الشاعر الجميل رضا محمود
شرفني مرورك الجميل والمشرف جدا
ومش عارف اقولك ايه والله فتحت نفسي بتعليقك الذي يعتبر وسام شرف وادتني دفعه قويه للكتابه
دمت بكل خير اخي الحبيب

الله الله الله يا استاذنا على فكرة القصيدة وطريقة الطرح والمضمون والتدرج الجميل فى القصيدة

الصراحة قصيدتك عجبتنى وهيفضل طرحك للمواضيع مستنين اجابتة وانتا لخصتة فى عنوان القصيدة الى شملها احنا عايزين اية وانا بطرح نفس السؤال الى بنسألة ياما طول عمرنا (احنا عايزين اية )

تقبل تحياتى واعجابى بالقصيدة يا استاذنا

khaled_dwidar كتب:: الله الله الله يا استاذنا على فكرة القصيدة وطريقة الطرح والمضمون والتدرج الجميل فى القصيدة

الصراحة قصيدتك عجبتنى وهيفضل طرحك للمواضيع مستنين اجابتة وانتا لخصتة فى عنوان القصيدة الى شملها احنا عايزين اية وانا بطرح نفس السؤال الى بنسألة ياما طول عمرنا (احنا عايزين اية )

تقبل تحياتى واعجابى بالقصيدة يا استاذنا

شاعرنا الجميل خالد دويدار
شرفني جدا مرورك
وسررررررت جدا لاعجابك بالقصيده وربنا يوفقنا جميعا يا رب الى ما فيه الخير

» عايزين ريس
» عايزين يخربوها .......
» عايزين الريس
» عايزين ريّس
» عايزين جمال