إزاى حروفك تعرفك

إزاى حروفك تعرفك
::
::
::
جوّاك كلام مكتوب
إيدك ماتلمسهوش
وكلام كتير يعرفك
ناكره متعرفهوش
وبتبني بيت يسكنك
روحك ماتسكنهوش
نسيم هواك يدخلك
وردّك ولاتشموش
صوت للكلام يتحكى
ودنك ماتسمعشى
وعنيك بتسكن صداه
لكن ماتلمحشى
حروف كلامك وطن
يوم هجرتك بيندهك
ولو نسيته زمن
يحضنها ويفكّرك
يرسمها ف ملامحك
فوق السطور صوّرك
ويعرّفك
إزاى حروف تعرفك
تنكرها ليه ف أصلها
تربط خيوط توصلك
تلاقيك بتقطع وصلها
خايف حروفك تنكرك
وحدك تقرر فصلها
من دفترك
يمكن ف يوم تكرهك
الحرف فيك ساكن
وحبّك سِكّته
لو يوم قطعت صوته
عمرك ماتسَكّته
لأنه رفيق حياه
لو مرة تهت عنه
أو مرة هوّ تاه
تغرّبكم أماكن
من غربتك يخطفك
ويرجّعك يعرّفك
إزاى حروفك تعرفك
::
منى حواس

كلمات جميلة تفيض بمعانى رائعة
نص بديع اختى الكريمة
دمت بحفظ الرحمن

مضمون شامل وكلمات لها صدي موسيقي

رائع حقا ما قرأت هنا

دمت بكل ود

صوت للكلام يتحكى.............ودنك ماتسمعشى

وعنيك بتسكن صداه................لكن ماتلمحشى

حروف كلامك وطن..........يوم هجرتك بيندهك

ولو نسيته زمن..................يحضنها ويفكّرك

انتي مش محتاجة توقعي على لوحاتك الفنية

لكي بصمة جمالية لا تخطئها أذن ولا عين

دمتي مبدعه